Монголын боксын холбооны ахлах дасгалжуулагч, гавьяат дасгалжуулагч Д.Батсүрэн үүрэгт ажлаа хүлээлгэн өгчээ.

Тодруулбал, хэд хоногийн өмнө манай боксын баг тамирчид “Олимп” бааз дахь нэгдсэн бэлтгэлд гарахдаа ахлах дасгалжуулагчгүй гарсан байна. Гавьяат дасгалжуулагч Д.Батсүрэн нь тэрхүү цугларалтын өмнө өөрийн хүсэлтээр ажлаа өгсөн тул түүний албыг залуучуудын шигшээ багийн дасгалжуулагч О.Батхүү түр орлон баг тамирчидаа бэлтгэж байгаа гэнэ.

Олимп хаяанд ирсэн энэ үед Д.Батсүрэнг ажлаа ийнхүү өгсөнийг боксын хүрээнийхэн олон янзаар ярьж байгаа ч өнгөрсөн хавар дасгалжуулагч, тамирчны хооронд өрнөсөн маргаантай холбох хүн олон байна.

Д.Батсүрэн нь 2014 онд ахлах дасгалжуулагчийн үүрэгт ажлаа гавьяат дасгалжуулагч Д.Ганзоригоос хүлээн авсан юм. Түүнийг шигшээ баг удирдах хугацаанд гавьяат тамирчин Д.Отгондалай “Рио-2016” олимпийн наадмаас хүрэл, ДАШТ-ээс хүрэл, М.Нандинцэцэг ДАШТ-ээс хүрэл, Э.Цэндбаатар ДАШТ-ээс хүрэл медалийг хүртэж байсан билээ.

Олимпийн наадам хөшигөө нээхэд ердөө ганцхан жил үлдэж байхад боксын шигшээ баг ахлах дасгалжуулагчгүй бэлтгэл сургуулилтаа хийсээр. Гэтэл энэ хариуцлагатай албанд хэн хэзээ эзэн суух нь тодорхойгүй байна.

Б.Жаргал