Монголын хөлбөмбөгийн холбооны 2020 оны “Нэгдүгээр лиг” замынхаа талд орлоо. Нийт 10 баг 18 тойргийн тоглолтод өрсөлдөж, алтан медаль хүртсэн баг ирэх жил дээд лигт дэвших бол мөнгөн медаль хүртсэн баг нэмэлт тоглолт хийх юм. Өнгөрсөн жил “Нэгдүгээр лиг”-ээс хүрэл медаль хүртсэн “Дөчин Мянгат Юнайтед” (“ДМЮ” хэмээн товчилдог) энэ жил эхний есөн тоглолтын дараа хүснэгтийн тавдугаар байрт бичигдэж байгаа ч дээд лиг рүү дэвших зорилгоо биелүүлнэ гэдэгтэй итгэлтэй байна. Тус багийн ерөнхий менежер Шаашингийн Батсуурьтай ярилцсанаа хүргэе.

-“ДМЮ” клуб сүүлийн жилүүдэд “Нэгдүгээр лиг”-ийн хамгийн залуу бүрэлдэхүүнтэй баг байсан. Та багийн бүрэлдэхүүнээ танилцуулахгүй юу?

-Тийм ээ. Манайх 2015 онд анх “Нэгдүгээр лиг”-т оролцсон цагаасаа хойш Монголын хөлбөмбөгийн насанд хүрэгчдийн ангиллын хамгийн залуу бүрэлдэхүүнтэй баг байсан. 2017 онд МХБХ-ны цом, насанд хүрэгчдийн УАШТ-ий 1/4 шигшээд шалгарсан багийн бүрэлдэхүүнд насанд хүрсэн ч нэг ч тоглогч байгаагүй. Өнгөрсөн жил “Нэгдүгээр лиг”-ээс хүрэл медаль хүртсэн багийн дундаж нас 17.17 байлаа.

Харин энэ жил Б.Билгүүн гэж “ДМЮ” клубийн менежерээр ажиллаж байсан, манай соёл, уламжлалыг сайн мэдэх ахмад тоглогчийг элсүүлсэн. Сүүлийн хэдэн жил насанд хүрэгчдийн УАШТ, “Нэгдүгээр лиг”-т тоглосон түүнийг талбай дээр ч, талбайн гадна ч хүүхдүүдэд үзүүлэх нөлөө их хэрэгтэй. Б.Билгүүнийг эс тооцвол 2000 оны С.Жамбалбавуу, 2001 оны Б.Чойжилсүрэн, 2002 оны Б.Чингүүн, Г.Тэмүүжин, М.Тэмүүжин, Ж.Эрдэнэзолбоо, С.Мөнхтулга, М.Анар, Э.Ган-Эрдэнэ, Б.Насан-Эрдэнэ, Э.Тэмүүлэн, Н.Ананд, Э.Алтангэрэл, Э.Баяржаргал, 2003 оны Б.Дамдинсүрэн, Ц.Мөнх-Эрдэнэ, 2004 оны А.Балжинням, Б.Билгүүн гэсэн тун залуу бүрэлдэхүүнтэй байна.

-Хөлбөмбөг сонирхогчид танай багийн А.Мөнх-Оргил, Т.Анхбаяр гэсэн шилдэг тоглогчдыг сайн мэддэг. Тэд яагаад тоглохгүй байна вэ?

-2000 онд төрсөн, энэ багийн гол ачааг олон жилийн турш нуруундаа үүрсэн тоглогчид маань энэ жил байхгүй. А.Баттулга оны өмнө Ирланд явсан, А.Мөнх-Оргил энэ жил гадаадад суралцах болсон. Харин Т.Анхбаярыгаа футзалын лигийн олон удаагийн аварга “Унаганууд” клубт зээлээр тоглуулж байна.

-Танайх өнгөрсөн жил улирлын эхний хагасыг тэргүүлсэн ч энэ жил дөнгөж тавдугаар байрт яваа нь гол тоглогчид байхгүйтэй холбоотой байжээ?

-Шууд тэгж хэлж болохгүй. Тэд байхгүй нь сул тал болж байгаа ч нөгөөтэйгүүр дүү нарынх нь хувьд өөрсдийгөө нээх нь том боломж. Харин бидний олон оноо алдсан нь хэд хэдэн шалтгаантай. Хамгийн гол нь хөл хорионы улмаас улирлын өмнөх бэлтгэлийг сайн хийж чадсангүй. Жил бүр улирлын өмнөх бэлтгэлийг сайн хийдэг нь манай багийн давуу тал байсаар ирсэн. Тавдугаар сараас заал, талбай нээгдэж эхэлсэн ч манай ихэнх тоглогч дунд сургуулиа төгсч, Элсэлтийн ерөнхий шалгалт өгсөн тул бүрэн цугларч чадаагүй. Шалгалт шүүлэг дуусав уу, үгүй юу шууд лиг эхэлсэн.

-Бэлтгэл сайн хийгээгүй тоглогчид бэртэх нь их байдаг ...

-Тийм ээ. Манай багт ийм асуудал их байна. Улирал эхлэхэд л бэртэлтэй байсан Э.Тэмүүлэн, Э.Баяржаргал нар аргагүйн эрхэнд зарим тоглолтод цөөн минут тоглолоо. М.Анар багтаа туслахыг маш их хүсч байгаа ч хөл нь болж өгөхгүй удаж байна. Манай багийн уураг тархи болох учиртай Б.Насан-Эрдэнэ биеийн байдлаас болж нэг хэсэг олигтой бэлтгэл хийж чадаагүй. Түүнийг сайнгүй байхад бид сүүлийн гурван тоглолтоос найман оноо алдсан. Өнгөрсөн бямба гаригт “Лионс”-той тоглоход С.Мөнхтулга нүүр рүүгээ өшиглүүлж, Ж.Эрдэнэзолбоо хөлөө бэртээснээс хойш бэлтгэл хийж чадахгүй байна. Энэ жил хамгийн сайн бэлтгэлтэй байгаа Б.Чойжилсүрэн хоёрдугаар тойргийн тоглолтод гарынхаа зөөлөн эдийг гэмтээсэн ч ашгүй хурдан эргэн ирлээ. Бусад тоглогч ч их ноцтой биш бэртлийг тэсээд л явж байна. Энэ үед 2004 онд төрсөн А.Балжинням, Б.Билгүүн хоёр их хэрэг болж байна. Уг нь энэ жил Б.Ууганбаяр маань “Нэгдүгээр лиг”-ийн нээлт болох байлаа. Гэвч МХБХ-ноос гаргасан шинэ дүрмийн дагуу тоглолтод оролцох боломжгүй болсон. Түүнийг аравдугаар сарын 30-нд 16 нас хүрэхээс өмнө лиг өндөрлөнө.

-Удахгүй лигийн хоёрдугаар хагас эхэлнэ. Сүүлийн есөн тоглолтод хэр амжилт үзүүлнэ гэж бодож байна вэ?

-Бид бууж өгдөг баг биш. Эхний хагасын байдлаар хүснэгтийг тэргүүлж байгаа багаас есөн оноо алдаж байгаа ч ирэх жил дээд лигт хүч үзэх зорилго маань өөрчлөгдөөгүй. Залуу хүний эрч хүч, аз хийморь гэж байдаг. Хүүхдүүд маань нэг айхтар сэргээд, эрчээ авчихвал юунд ч дийлдэхгүй. Хоёрдугаар хагасын бүх тоглолтдоо хожих боломж бий. Хэрвээ зорилго маань биелэх юм бол маш том төлөвлөгөө бий.

-Ярилцсанд баярлалаа. Зорилгодоо хүрэх болтугай.

-Баярлалаа.

Б.Жаргал