Дэлхийн аварга Дарья Билодид дэлгэцэнд мөнхрөв

2020-8-31

17 насандаа жүдо бөхийн дэлхийн аварга хэмээх цолыг хүртсэн Украины нэрт бөх Дарья Билодидын намтраар бүтээсэн "Анаконда" баримтат киноны нээлтийн ёслол энэ сарын 29-нд болов.

Дэлхийн хошой аварга Украин бүсгүйг ивээн тэтгэдэг Японы автомашин үйлдвэрлэлийн "Мицүбиши моторс" компани тэрхүү баримтат киноныг ивээн тэтгэж ажилласан бөгөөд нээлтийн тов энэ оны гуравдугаар сарын 25 хэмээн зарлагдсан ч дэлхий дахинд хурдацтай тархаад буй коронавируст цар тахлын улмаас хойшлогдон нээлтээ хийсэн нь энэ.

Баримтат киноны нээлтийн ёслолд түүний аав болох жүдо бөхийн ДАШТ-ий хүрэл медальт (2005), Европын хошой аварга (2001, 2003) Геннади Билодид, ээж жүдо бөхийн спортын мастер, ОХУ-ын өсвөрийн болон армийн аварга С.Кузнецова болон гэр бүл найз нөхдүүд нь хүрэлцэн ирсэн байна. Ташрамд сонирхуулахад, олимпийн аварга уран гулгагч Алина Загитоваг бишрэн шүтдэг Дарья Билодид нь 2017 оноос эхлэн насанд хүрэгчдийн тэмцээнд зодоглох болсноос хойш оролцсон тэмцээн болгондоо түрүүлдэг гэхэд хилсдэхгүй.

Тэрбээр 2017 оны БНХАУ-ын Хөх хотын гран прид хүрэл медаль хүртэхдээ Италийн Ф.Миланид, мөн тэр жилийнхээ дэлхийн аваргын 3 дугаар тойрогт олимп, дэлхийн хүрэл медальт Казахстаны Г.Отгонцэцэгт, өнгөрсөн жилийн Гүржийн Тбилисийн гран прин финалд Францийн Мелани Климентэд ялагдаж байжээ.

Б.Жаргал

АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.