Тулгар төрийн 2229, Их Монгол Улсын 814, Ардын хувьсгалын 99 жилийн ой, Үндэсний их баяр наадамд шөвгөрсөн бөхчүүдээс допингийн шинжилгээг анх авсанаас хойш 21 дэх жилтэйгээ золгож байна.
Энэ жилийн наадамд барилдсан бөхчүүдийн гурав нь допингийн шинжилгээнд бүдэрсэн тухай мэдээлэл гарсан. Тухайлбал, аварга Н.Батсуурь, арслан Р.Пүрэвдагва, харцага Б.Бат-Орших нарыг нэрлэсэн ч асуудал эцэслээгүй байгаа билээ. Допинг хэрэглэсэн бөхийн тоог гурав гэх боловч нэрсийг албан ёсоор зарлаагүй.
Хэрэв дээрх бөхчүүд допинг хэрэглэсэн нь тогтоогдвол цол болон чимгээ хураалгаж тэдэнд унасан бөхчүүдийн амжилт ахих учиртай.
Тэгээд зогсохгүй барилдах эрхээ хоёр жилээр хасуулна. Улсын аварга Н.Батсуурьт тавын даваанд унасан аймгийн арслан Б.Суманчулуун улсын начин, зургаагийн даваанд унасан Ц.Мөнхбаяр харцага, долоогийн даваанд унасан Ц.Одбаяр заан, наймын даваанд унасан М.Бадарч гарьд цолтон болно. Мөн улсын арслан Р.Пүрэвдагвад тавын даваанд унасан Б.Эрдэнэхүү өсөх идэр чимэг, зургаагийн даваанд унасан Ш.Пүрэвгарьд харцага цолыг нөхөж олгох юм. Тэгвэл улсын харцага цолыг шинээр хүртсэн Б.Бат-Оршиход тавын даваанд унасан аймгийн арслан Ц.Сандагдорж улсын начин, зургаагийн даваанд унасан Б.Орхонбаяр харцага цол хүртэх билээ.
Дээрх гурван бөхийг допинг хэрэглэсэн гэж үзвэл хоёр бөх шинээр цол авч, тав нь цол ахиж, хоёр нь чимэг нэмэх нь.
А.Сүх
Сэтгэгдэл (16)