Монгол бөхийн өргөөнд Цэргийн цол, чимэг олгох Бүх цэргийн наадам болж өндөрлөлөө. 29 дэх удаагийн барилдаанд аймгийн хурц арслан Б.Номиндалай, Ё.Эрдэнэжаргал, Н.Баттүвшин Д.Цэвэлсодном, С.Очирбат тэргүүтэй 256 бөх зодоглосон бөгөөд аймгийн арслан 106, аймгийн заан 33, аймгийн харцага, аймгийн начин 54, сумын цолтой 27 бөх хүч үзэв. Барилдаанд Архангай аймгийн Батцэнгэл сумын харьяат, жүдо бөхийн ДАШТ-ий хүрэл медальт, олимпийн наадмын шагналт байр, “Сүлд” спортын хорооны тамирчин, аймгийн заан Л.Отгонбаатар түрүүлж, аймгийн хурц арслан Э.Ууганбаяр үзүүрлэлээ. Түрүүлсэн Л.Отгонбаатар цэргийн арслан цол хүртэж, Архангайчууд Бүх цэргийн наадмын долоо дахь түрүүгээ авсан юм. Их шөвөгт аймгийн арслан Г.Бадрах, аймгийн заан М.Лхагвагэрэл нар шалгарлаа. Энэ наадамд хоёр сумын заан цол нэмсэн нь Увс аймгийн Ховд сумын харьяат Г.Эрдэнэтогтох, Ховд аймгийн Буянт сумын харьяат Н.Амасайхан нар байв. Г.Эрдэнэтогтохын хувьд түрүү бөхийн тааварт нэрлэгдэж байсан аймгийн арслан Б.Түмэндэмбэрэлээр начин цол хүртсэн бол Н.Амарсайхан нутгийн арслан Б.Тайвангаар цолонд хүрлээ.
Б.Жаргал