Тулгар төрийн 2229, Их Монгол Улсын 814, Ардын хувьсгалын 99 жилийн ой, Үндэсний их баяр наадамд шөвгөрсөн бөхчүүдээс допингийн шинжилгээ авахад гурван бөхөөс хориотой эмийн бодис илэрсэн. Тэдгээр бөхчүүдийн нэрсийг албан ёсоор зарлаагүй байхад өнөөдөр С.Батсуурь аварга хариуцлагаа үүрнэ гээд ард түмнээсээ уучлалт гуйлаа. Ёстой л аварга хүн ийм баймаар гэлтэй санагдав. Допинг хэрэглэсэн бөхийг зөвтгөх гэсэнгүй.
Үндэсний бөхөд допинг хэрэглэсэн нийт гуч орчим бөх байдгаас олны өмнө уучлалт гуйсан нь ганц тэр юм.
Ингэснээр залуу аварга отгон наадамд үзүүлсэн тод сайхан хэмээх чимгээ хураалгаж, түүнд унасан найман бөх даваа ахихаар болж байна. Тэр дундаа Н.Батсуурьт амлуулж унасан М.Бадарч гарьд, Ц.Одбаяр заан, Ц.Мөнхбаяр харцага, Б.Суманчулуун начин цол хүртэх нь тодорхой. Цол ахих дөрвөөс аймгийн хурц арслан Б.Суманчулууныг энд онцолъё. Барилдаан бүрт тогтмол оролцож, зорилгоосоо ухарсан түүх түүнд үгүй. Тэрбээр 2014 оны Баяр наадмын тавын даваанд нутгийн гарьд Ж.Бат-Эрдэнийг давснаар улсын начин цолны үнэмлэх тэмдгээ авсан ч наадмын дараа допингийн шинжилгээгээр түүнээс хориотой эмийн бодис илэрсэн гэж үзэн, тав давсан амжилтыг тооцохгүй болгон цолыг нь хураасан билээ. Бөхийн олон дэмжигч түүний өмнөөс халагласан даа. Мөн наадамд одгүй бөх гэвэл түүнийг л хэлэх байх.
Б.Суманчулуун аймгийн арслан цолтой үлдэж, хоёр жилийн дараа улсын цолны төлөө дахин дайралт хийсэн ч тавын даваанд улсын арслан Ц.Содномдоржид унасан нь даанч харамсалтай. Түүнд тавын даваа хэзээнээс халгаатай гэдэг нь үнэн.
Түүхт 90 жилийн ойн баяр наадмын начны даваанд гарч барилдаж явсан удаатай. Их ойн баяр наадмаар барилдах бөхийн тоо нэг нугарч нэмэгддэг тул улсын цолны төлөө яваа залууст алдаж болохгүй боломж гардаг. Тэрхүү наадмын тавын даваанд бөхчүүдийн хэлдгээр гуйж биш гуядаж гарч ирэхэд нь улсын харцага А.Цацабшир амлан авч унагасан. Үнэн хүчийг үзээд үнэндээ бараагүй юм. Наадам үүгээр дуусаагүй. Өнгөрсөн баяр наадмын тавын даваанд хүч бяр ид тэгширсэн залуу аварга Н.Батсуурьт амлуулахад бөхийн хорхойтнууд зөв харж инээн, буруу харж уйлна гэдэг шиг харж суусан биз ээ. Улсын баяр наадмын начин цолны даваанд дөрвөнтээ гарч барилдсан нь энэ юм. Залуу аваргатай тунчиг сайн барилдаад унасных нь дараа засуул нь “Харамсаад яах вэ. Хойтон жил их ойн наадам хүлээж байна” хэмээн аргадаж, арслан ч харуусал дүүрэн тахимаа өгсөн.
Дараа жилийн наадам даанч хол байна даа гэж байтал допингийн хариу удалгүй ирж, түүнийг давсан бөхөөс хориотой эмийн бодис илэрлээ гэх мэдээлэл гарсан нь саяхан.
Үүний араас цол ахих бөхчүүдийн нэрсийг сонсоход хурц арслан Б.Суманчулуун Улсынхаа Ерөнхийлөгчөөс начин цолны үнэмлэх тэмдгээ хоёронтоо гардах нь нэгэнт тодорхой боллоо. Ийнхүү Улсынхаа баяр наадмын тавын даваанд дөрвөн удаа хүч үзсэн түүнд допинг нэг удаа ус, нэг удаа тус болох шиг.
Б.Жаргал
Сэтгэгдэл (10)