АНУ-ын Миссисипи мужийн эрх баригчид залуу трансжендер тамирчдыг эмэгтэйчүүдийн спорт, тэр дундаа хөнгөн атлетикийн спортын багт орох, энэ төрлийн уралдаан тэмцээнд оролцох эрхийг нь хориглох эсэх дээр санал хураажээ. Трансжендер тамирчдыг дунд болон ахлах сургууль, их дээд сургуулиудын багт орохыг хориглох эсэх дээр мужийн сенатаас 34-9 гэсэн саналаар хориглохоор болсон аж. Одоо уг хоригийг тус мужийн Төлөөлөгчдийн танхимаар оруулан эцсийн шийдвэрийг гаргах юм.

Миссисипи муж трансжендер хүмүүсийн эрхтэй холбоотой хууль баталсан анхны муж биш юм.

Монтана, Хойд Дакота зэрэг 14 муж улсын хууль тогтоогчид ЛГБТК оршин суугчдын эрх чөлөөг хязгаарлах хуулийн төслүүдийг баталсан байдаг. Өнгөрсөн оны 4-р сард Айдахо муж трансжендер тамирчдыг эмэгтэйчүүдийн спортын тэмцээнд оролцохыг хориглосон анхны муж болжээ. Хуулийн төсөлд байгалийн тестостерон дааврын бэлдмэлийг гормоны эмчилгээгээр бууруулах боломжгүй бөгөөд хүйс тодорхой багтай байх нь хүйсийн тэгш байдлыг хангадаг гэж мэдэгдэж байлаа. Трансжендер залуу тамирчдыг эмэгтэйчүүдийн хөнгөн атлетикийн спортод хүч үзэхийг хориглох хуулийг батлагчид “байгалиасаа эр хүйст төрсөн тамирчид эмэгтэйчүүдтэй өрсөлдөх нь шударга бусаар давуу тал олгодог” гэж үздэг. Нөгөө талд энэ төрлийн хуулийг ЛГБТК хүмүүсийн эрхийн төлөө тэмцэгчид хүмүүсийг ялгаварлан үзсэн, трансфобик шинжтэй хэмээн шүүмжилдэг.

Өнгөрсөн сард Ерөнхийлөгч Жо Байден сургуулийн хүрээний спорт, ажлын байр болон бусад орчинд хүйс, бэлгийн чиг баримжаагаар ялгаварлан гадуурхахыг хориглох тухай тушаалд гарын үсэг зурсан. Уг тушаалд "Хүн болгонд хүндэтгэлтэй хандаж, хэн ч бай айдасгүйгээр амьдрах чадвартай байх ёстой" хэмээн бичигдсэн байдаг.