Монгол Улсын Ерөнхийлөгчийн зарлигаар салбар бүрт өндөр амжилт гаргасан зарим хүнд төрийн дээд шагнал, одон медаль гардуулж байна. Ёстой л шагналын хуртай өдрүүд өрнөж байна. Спортын салбараас цөөнгүй тамирчин гавьяат хэмээх эрхэм алдарыг энгэртээ гялалзуулахаар болсон сайхан мэдээ дуулдлаа.
Нэн ялангуяа жүдо бөхийн ДАШТ-ий хүрэл медальт Л.Отгонбаатар, Ө.Дүүрэнбаяр, Ази тивийн аварга Д.Төмөрхүлэг, О.Ууганбаатар нарын алдартнууд энэ цаг үеэс гавьяат хэмээн дуудуулах нь. Шагнал нүдээ олох сайхан.
Тэд эх орныхоо нэр алдарыг тив, дэлхий, олимпын дэвжээнд олонтаа цуурайтуулж, их дуулга, гранпри тэмцээнээс бишгүй их медаль авсан гавьяатнууд юм. Амжилт, ялалтаар нь тэднийг дүгнэхээс илүүтэй спорт, олимпизмыг хүүхэд, залууст сурталчлан таниулж чадсан үйлстэн гэдгийг нь онцлох нь зүйтэй болов уу.
Удахгүй будант Будапештэд эхлэх ДАШТ, цаашлаад наран улсын нийслэл Токиод болох зуны олимпын наадмын өмнө ийнхүү шагнаж урамшуулж буй нь жүдочин залууст урам болж, өндөр амжилт гаргахад нь сэтгэл санааны ихээхэн дэм болох буйзаа.
Б.Жаргал
