Монголын үндэсний бөхийн холбооны “Их Эе”-ийн ээлжит бус хурал өчигдөр Монгол бөхийн өргөөнд болж, тус холбооны тэргүүнээр улсын заан Ц.Магалжавыг сонголоо. Тэргүүний төлөөх өрсөлдөөнд гурван аварга, гурван зааны нэрийг дэвшүүлсэн юм. Аваргууд нэрээ татаж, улсын заан Б.Сайнбаяр, сумын заан Б.Баярбаатар нар үзээд үнэндээ барсангүй.

Онцолмоор нь он удаан жил маргасан хоёр талын төлөөлөл энэ мөчөөс нэгэн дээвэр дор багтах нь. За энэ ч яахав. Бөхийн холбооны үйл ажиллагааг олон жил тууштай шүүмжилж ирсэн Л.Чинбатын талынхан удтал хүлээсэн холбооныхоо тэргүүний төлөөх нэн чухал сонгуулийн гадна үлдсэн нь сонин байна. Нөгөө Бөхийн өргөөнийхөө хаалгыг эвдэн байж тэмцэж ирсэн зарим хүн энэ хуралд ирээгүй нь даанч хачирхалтай.

Улсын аварга О.Балжинням, С.Мөнхбат нарыг танхимаас тэргүүний төлөөх өрсөлдөөнд дэвшүүлсэн ч Ц.Магалжавт зайгаа тавьж өгсөн. Балжаа аварга “дэд тэргүүн болох хүсэлтэй тул нэрээ татаж байна” хэмээн үнэнээ хэлсэн бол залуу аварга тэргүүн болох гэж ирээгүй хэмээн зай барив. Уг нь Увсынхан ийм амар тахим өгөх хүмүүс биш л дээ. Иймээс ч МҮБХ-ны удирдлагуудыг Л.Чинбатын талынхантай тохироо хийсэн гэж үзэх хүн байна. Шинэ тэргүүн энэ сонгуульд илэрхий ялахад Л.Чинбатын талынхан чамгүй нөлөө үзүүлсэн байх магадлалтай.

Энэ ч хамаа алга. Тэд маань сая нэг учраа олсон бол дэвшил юм. Одоо л нэг эв эеэ олох нь гэж олон хүн талархан хүлээн авлаа. Гэтэл баярлахад арай эрт бололтой. Юу гэвээс энэ мөчөөс Л.Чинбатын бус өөр хэсэг бөхчүүд холбооныхоо одоогийн удирдлагуудтай түнжин хагарах эхлэл тавигдсан нь даанч харамсалтай. Ганцхан жилийн өмнө МҮБХ-ны гүйцэтгэх захирлын ажлаа хүлээлгэн өгсөн Б.Сайнбаяр заан тэргүүн болохоор дахин хаалга тогшин гарч ирсэн нь нэгийг өгүүлнэ. Түүнийг дэмжиж цөөнгүй хүн үзэл бодлоо чанга дуугаар илэрхийлэв. Б.Сайнбаярт ажлаа өгөх нэг шалтаг, эргэн ирэх нэг шалтгаан байгаа бололтой. Тэр нь Л.Чинбатын талтай эвийн гэрээ байгуулсан холбооны удирдлагууд юм шиг.

Б.Сайнбаяр ганцаараа биш. Аварга цолтой хүн хүртэл түүний эсэргүйцлийн гол дуу хоолой нь болж буй. Өмнөх тэргүүн тэдний ард бий гэж ярих юм. МҮБХ-ны шинэ тэргүүн Ц.Магалжав сөргөлдөгч Л.Чинбатын талынхантай учраа олоод зогсохгүй цэцдийн зөвлөлийн багагүй суудлыг өгөх тохироотой байсан нь ил болоход зарим бөх ийн бухимдах болсон. Бас тэдэнд дэд тэргүүн ч амласан бололтой. Хөшигний ард өрнөсөн энэ бүх тохироог харсан нэгэн идэр аварга амаа үдүүлээд зүгээр суугаагүй юм. Холбооныхоо удирдлагуудыг хамгийн их шүүмжилж, хурлын уур амьсгалыг ч харлуулж байлаа.

Түүний хурал дээр хэлсэн санал нь допингтой 38 бөхийг нэн даруй зарлах, барьц сонгох дүрмийн шинэчлэлтэй холбоотой асуулт зонхилж байв. Энэ бүх асуудлууд нь өндөр төвшинд шийдвэрлэх шатандаа орсон юм билээ. Иймээс МҮБХ-ны шинэ тэргүүн маань өмнөхөөсөө дутахааргүй хэл амтай он жилийг угтаж мэдэхээр байна. Одоо тохирсон ёсоор өмнөх сөрөг хүчнийхээ хэлсэн үгийг дуулгавартай дагах, эс бөгөөс өмнөх тэргүүнийхээ саналыг хүлээн авах гэсэн хоёр сонголт байх шиг.

Б.Жаргал