Монголын хөлбөмбөгийн шилдэг тоглогч Н.Цэдэнбал энэ өдөр (6.1-нд) зодог тайлахаа илэрхийллээ. Эх орныхоо хөлбөмбөгийн амжилт ялалт, хөгжилд оруулсан түүний хувь нэмэр их билээ. Тэр 1999 онд өсвөр үеийнхний тэмцээнд анх орсон цагаас өдгөө 22 жилийг үджээ.
Түүний сүүлд үзүүлсэн амжилтаас дурдвал "Катар-2022" ДАШТ-ний урьдчилсан шатны тоглолтод гоол оруулж, ОУХБХ-ны Ерөнхийлөгчөөс ДАШТ-ний шигшээ тоглолт үзэх урилга авсан эрхэм алдартан юм. Эх орондоо үзүүлсэн амжилт нь гэвэл, МХБХ-ны дээд лигийн хоёр удаагийн аварга, МХБХ-ны Цомын гурван удаагийн аварга, лигийн шилдэг тоглогч шагналыг гурван удаа хүртэж байв.
2009 оноос шигшээ багтаа дуудагдаж, олон улсын 34 удаагийн албан ёсны тоглолтод оролцохдоо 7 гоол оруулжээ. Мөн 2018 онд Монгол Улсын шигшээ баг анх удаа Зүүн Азийн аварга шалгаруулах тэмцээнд хэсгээсээ шалгарахад тухай тэмцээний “Үнэ цэнтэй тоглогч”-ийн шагнал хүртэж, 2020 онд хөлбөмбөгийн спортоор ОУХМ цол авсан тоглогч юм. Энэ бол түүний ногоон талбайд үзүүлсэн амжилтын товч намтар. Харин футзалын шигшээ багийн бүрэлдэхүүнд олон улсын албан ёсны таван тоглолтод оролцохдоо 6 гоол оруулсан амжилттай спортын замналаа ийн өндөрлүүлж байна.
