МҮОХ-ны дэд ерөнхийлөгч Ч.Наранбаатараас цаг үеийн асуудлаар тодрууллаа.

-Өнөө өглөөнөөс Н.Түвшинбаярыг тамгаа өгсөн талаар мэдээлж байна. Энэ үнэн үү?

-Үнэн. Өнгөрсөн баасан гарагт өөрийн биеэр тамгаа өгөөд явсан. Одоо тамганы асуудалгүй боллоо. МҮОХ-ны үйл ажиллагаа хэвийн үргэлжлэх боломж бүрдэж байна.

-МҮОХ-ны Гүйцэтгэх зөвлөл өчигдөр хуралдсан тухай мэдээлэл байна. Юун талаар ярилцав?

-Тамганы асуудал, МҮОХ-ны үйл ажиллагааны цаашдын асуудлын талаар ярилцлаа. Иймд дээрх асуудалтай холбогдуулан олон нийтэд мэдээлэл өгөх юм.

-Дараагийн ерөнхийлөгчийг сонгох хүртэл та МҮОХ-г удирдах уу?

-Тийм. Дүрмийн дагуу зуны олимпийн наадмын дараа МҮОХ-ны бүх гишүүдийн чуулган болох хүртэл үүрэг гүйцэтгэнэ.

-Бүх гишүүдийн чуулган хэзээ болох юм?

-Эхлээд энэ сарын 23-нд 170 гаруй хүний бүрэлдэхүүнтэй бүх гишүүдийн хурал зохион байгуулна. Эндээс бүх гишүүдийн чуулганы хугацааг товлоно.

-Н.Түвшинбаяр тамгаа өгөхдөө юу хэлж байх юм?

-Сайн ажиллаарай гээд амжилт хүсээд удахгүй ажлаа хүлээлгэж өгнө гэсэн.

-Ажлаа хүлээлгэж өгөөгүй хэрэг үү?

-Ажлаа өгөөгүй ч үүрэгт ажлаас нь түдгэлзүүлэх шийдвэр гарсан учраас автоматаар чөлөөлөгдөж байгаа. Хуулийн байгууллага эцсийн шийдвэрийг гаргана. Буруутай гэж үзвэл түдгэлзүүлэх шийдвэрийг хэвээр үлдээж, буруугүй гэвэл цааш их, багаар асуудал үргэлжилнэ.

А.Сүх