Монголын нэр хүндийг олимп, тив, дэлхийн тавцанд өндөрт өргөсөн спортын цөөн төрөл бий. Тэр дундаа чөлөөт бөх гэвэл спортыг шимтэн сонирхдоггүй хүн ч мэдэх байх. Тэгвэл “Хар Мөөеө” буюу Оросоогийн Мөнхбат гэвэл мэдэх нь хэд бол. Олон түмэндээ Халхын хар Мөөеө хэмээн хүндлэгддэг энэ эрхэм өнөөдөр төрийн ордноос гавьяат дасгалжуулагчийн цол, тэмдгийг энгэртээ гялалзуулсаар гарч ирлээ.

Тэр гавьяатыг гуйж биш гуядаж авсан юм.

Олон шавь нь түүнийг баярлан угтлаа. Энэ гүндүүгүй, гүдэсхэн эр 1980-аад оны дунд үед Болгарын Биеийн тамирын дээд сургуулийг багш, дасгалжуулагч мэргэжлээр төгсөн гарсан манай спортын ууган боловсон хүчний нэг юм. Өөрөөс нь нас ах дархан аварга Д.Цэрэнтогтох хүртэл чөлөөт бөхөөр түүний шавь байсан гэдэг. “Шонхор” дэвжээний дасгалжуулагч болж, олон залуусыг спорт руу уруу татаж, хөлийг нь дөрөөнд, гарыг нь ганзаганд хүргэсэн хүн бол Оросоогийн Мөнхбат.

Түүний шавь нараас дурдвал, дархан аварга, сонирхогчдын сүмо бөхийн дэлхийн аварга , гавьяат тамирчин А.Сүхбат, чөлөөт бөхийн Азийн АШТ-ий хошой мөнгө, хүрэл медальт, улсын гарьд, сонирхогчдын сүмо бөхийн анхны дэлхийн аварга, гавьяат тамирчин Б.Гантогтох, улсын заан, Тува улсын гавьяат тамирчин Д.Бумбаяр болон олон ч начин цолтон бий. Харин их спортоос та бидний хамгийн сайн мэдэх чөлөөт бөхийн “Софи-2001”, “Тегран-2002” ДАШТ-ий мөнгөн медальт, Азийн наадам, Азийн АШТ-ий хошой аварга, гавьяат тамирчин О.Пүрэвбаатар бол яах аргагүй онцлох шавь нь. Чөлөөт бөх уналтал орсон он жилүүдэд гагцхүү О.Мөнхбатын шавь нар хөнгөн, хүнд жинд Монголын нэрийг тахалж байсан юм даг. Түүний шавь нараас хамгийн өндөр амжилт гаргасан нь ДАШТ-ий хошой мөнгө, үндэсний бөхийн дархан аварга бол хамгийн бага амжилт үзүүлсэн нь улсын начин, спортын мастер хэмээдэг.

Б.Жаргал