2008 он. Тэр жил аймгийн арслан Б.Соронзонболд дархан аварга Г.Өсөхбаяраар долоо давж заан цол хүртэж байв.
Түүний хувьд тухайн наадамд барилдахгүй ч байж болох эрсдэлтэй тулж байсан байна. Энэ талаар тэрбээр өөрийн цахим хуудаст ийн бичжээ. Энэ наадмаар 11-ний өглөө цэнгэлдэх хүрээлэн орохдоо нагац ахынхаа найман настай хүүг цүнхээ харуулах, хань татахаар 21-р хорооллоос дагуулаад очлоо. Стадион орох гэтэл цагдаагийн хамгаалалт хүүхдийг оруулдаггүй дээ. "Манай гэр хол, буцаах арга байхгүй, оруулчих гэж их гуйгаад байдаггүй шүү.
Сүүлдээ цагдаа нар уурлан чи холд л доо ядаргаатай юм гэх мэтээр загнав. Би ч жаахан түргэн зантай хүн дорд өнгөөр харьцаад эхлэхээр нь тэссэнгүй сүртэй "п"-нүүд вэ гээд хэлээд тавьчихлаа. Тэгсэн цаанаас нэг дарга нь энэ яасан даварцан хулгайч вэ. Бариад доош нь хий гэж байна. Би ч хэдэн цагдаад цүнхтэйгээ чирэгдээд нөгөө хүүхдээ (дүү чарлаад л) дагуулаад цагдаа нарын байрлаж байсан подвольруу ороод саатуулагдав. Тэнд байсан зарим хүн болиочээ гэж орилсон ч тоож байгаа юм алга. Чирэгдээд л явлаа. Наадмын нээлт яваад дууслаа.
Нэгийн даваа эхэлсэн ч гаргадаггүй дээ. Тэгсэн нэг бөхөд дуртай цагдаа намайг өрөвдсөн үү "наад дарга чинь хөдлөхгүй шүү би дуудаадхая. Ирэхээр нь уучлалт гуйхгүй бол гаргахгүй" гэлээ. Удалгүй нөгөө цагдаа даргыгаа дагуулаад ирлээ. Дарга ч ирээд дахиад томорлоо. Энэ мууг ерөөсөө гаргахгүй шүү. Даварсан банди гээд. Би за ахаа уучлаарай одоо барилдах болчихлоо. Та гаргачих л даа гэж хэд хэдэн удаа гуйж байж нэг гарч билээ. Тэгээд үзсээр байж заан болчихов. Нөгөө ууртай дарга ирж баяр хүргэж байна. Би ч гарч ороход асуудалгүй боллоо. Бүр давраад ганц нэг хүн ч нөгөө дарга ахдаа хэлж байгаад оруулдаг болов. Ингэж нэг барцатаа гаргаж байсан юм. Нэг зүйлийг нэмж хэлэхээ мартаж ээ тэр дагуулж очсон хүүгийн нэр Өсөхбаяр.
Сэтгэгдэл (7)