Энэ сарын 6-12 өдрүүдэд Унгарын нийслэл Будапешт хотноо насанд хүрэгчдийн жүдо бөхийн аварга шалгаруулах тэмцээн амжилттай зохиогдож “Токио 2020” олимпын наадамд жин тус бүрд  оролцох боломжтой тамирчдын нэрс албан ёсоор тодорлоо.

Тэгвэл тус тэмцээнд манай урд хөрш болох БНХАУ-ын шигшээ баг цар тахлын улмаас тамирчдаа Унгар улс руу илгээгээгүй билээ. Тодруулбал БНХАУ шигшээ баг нь 2020 он гарснаас хойш хоёрхон Гранд Сламд (2021 онд Тбилиси болон Анталя) оролцсон бөгөөд тус тэмцээнүүдээсээ олимпын хангалттай оноо цуглуулж чадаагүй. Улмаар 2016 онд эрэгтэйчүүдийн жүдо бөхийн төрлөөр анх удаа олимпоос медаль хүртэн (-90кг жинд Чэн Сюньчжао нь МУГТ Л.Отгонбаатарыг ялж хүрэл медаль хүртсэн) мандаж явсан БНХАУ-ын эрэгтэй шигшээ баг Токиогийн олимпод оролцох боломжгүй болж байгаа нь харамсалтай.

Улмаар тус улсын шигшээ баг зөвхөн эмэгтэй зургаан тамирчдаа ирэх долдугаар сард Япон улс руу илгээхээр болж байна. Мөн БНХАУ-ын эрэгтэй шигшээ баг гурван тамирчдыг Токиогийн олимпод оролцуулахаар бэлдэж байсны хоёр нь Бүхэбилигэ (-90кг), Эрихэмүбатү (-100кг) гэх нэртэй Өвөрмонгол залуус байжээ.

Б.Жаргал