Японы нийслэл Токиод зуны олимпийн наадам хөшгөө нээхэд тун бага хугацаа үлдлээ. Энэ олимпод одоогоор манай улсаас нийт 42 тамирчин оролцохоор байна. Буудлага спортын төрлөөс эрэгтэйчүүдийн ангилалд Э.Даваахүү, эмэгтэйчүүдэд О.Гүндэгмаа, Ц.Анударь, О.Есүгэн нар олимпийн галын шугамд цэц мэргэнээ сорино.

Үүнээс гадна Олон улсын буудлага спортын холбооны дүрмийн өөрчлөлтөөр олимпийн наадмын гар бууны 10 метрийн холимог төрөлд эрэгтэй, эмэгтэй тамирчин баг болон оролцох боломтой болсон юм. Тиймээс холимог төрөлд Э.Даваахүүтэй хамт олимпийн наадамд оролцох эмэгтэй тамирчныг сонгон шалгаруулах сорил явуулахад О.Гүндэгмаа, Ц.Анударь нар өрсөлдлөө.

Энэ сорилд Хөдөлмөрийн баатар, гавьяат тамирчин О.Гүндэгмаа илүү оноо авч тэргүүлсэн ч залуу тамирчин Ц.Анударьд боломж олгон нэрээ татсан байна.

Ийнхүү “Токио-2020” олимпийн наадмын холимог төрөлд Монгол Улсаа төлөөлөн Э.Даваахүү, Ц.Анударь нар оролцохоор боллоо. Буудлага спортын төрөлд манай баг тамирчид 1964 оны олимпоос хойш тасралтгүй оролцоход Хөдөлмөрийн баатар, гавьяат тамирчин О.Гүндэгмаа мөнгө, гавьяат тамирчин Д.Мөнхбаяр хүрэл медаль хүртсэн түүхтэй.

Б.Жаргал