Монгол Улсын тамирчид олимп, паралимпийн хөтөлбөрт багтдаг спортын төрөлд олимп, ДАШТ-ээс медаль хүртсэн тохиолдолд Засгийн газраас сар бүр мөнгөн урамшуулал олгодог болоод найм дахь жилийнхээ нүүрийг үзэж байна. Энэ онд гэхэд 1.584.000.000 сая төгрөгийн урамшуулал төсөвлөсөн бөгөөд сар бүр 132.000.000 төгрөг олгож байгаа гэсэн. Бага мөнгө биш.

Тэгвэл энэхүү урамшуулалд “Барселон-1992” олимпийн наадмын хүрэл, ДАШТ-ий алт, хүрэл медальт, гавьяат тамирчин Доржсүрэнгийн Мөнхбаяр багтдаггүй гэдгийг сонсоод гайхлаа. Сая хэлсэн гурван медаль бол түүний Монгол Улсын нэрийн өмнөөс чухамдаа залуу насаа золин байж олж авсан амжилт юм. Ёстой л “тамирчны ялалт хямдхан олдоогүй” гэх үгтэй нэгэн дуу өөрийн эрхгүй нэгийг бодуулна. Төр түүний амжилтыг үнэлэх ёстой.

Хэрэв Д.Мөнхбаяр олимп, ДАШТ-д үзүүлсэн амжилтаараа Засгаас урамшуулал авах байсан бол сар бүр 4.5 сая (олимпийн хүрэл 2 сая, ДАШТ-ий алт хоёр сая, хүрэл 500.000) төгрөг тосох байжээ.

Гэвч Монголын нэрийг олон жил тахалсан Д.Мөнхбаяр төр засгаасаа сохор зоос ч авдаггүй нь хачирхалтай. Түүнд энэ урамшууллыг авахад ганц л зүйл саад болдог. Энэ тухай Д.Мөнхбаяр: “Манайхан бол чи Германы иргэн шүү дээ гэж хэлдэг. Энэ дүрэм журмыг гаргасан багийнхан арай бодлогогүй ажилласан юм болов уу, намайг яагаад бодсонгүй вэ гэсэн бодол төрдөг. Монголд давхар иргэншилтэй хүн олон байдаг.

1988 оны Сөүлийн олимпийн хүрэл медальт Нэргүйн Энхбат Америк, Монголын иргэншилтэй. Үүнийг ил гаргадаггүй, нуудаг л болохоос биш зөндөө бий” хэмээжээ. Түүний хэлсэн үнэн. Гавьяат тамирчин Н.Энхбат Монгол Улсын иргэн байхдаа олимпоос хүрэл медаль хүртэж, өдгөө 2 сая төгрөг авч байгаа юм. Н.Энхбат Америкаас эх орондоо ирэн очин амьдардаг. Яг л Д.Мөнхбаяр шиг.

Гэтэл Монголын төр яагаад тэгш бус хандах болов. Д.Мөнхбаяр герман иргэншилтэй ч монгол хүн. Түүний гол амжилтууд өдгөө Монголын нэр дээр бүртгэлтэй. Тэр үзүүлсэн амжилтынхаа үр шимийг бусдын адил хүртэх ёстой.

Б.Жаргал