Их Монгол Улс байгуулсаны 815, Ардын хувьсгалын 100 жилийн ойн баяр наадам нэг жилээр хойшилж, бөхчүүд, уяачид, сурчид наадмын бэлтгэлээс бууж байна. Улсын баяр наадам хугацаандаа болоогүй хоёр дахь тохиолдол энэ юм. Хэдий өнөө жил наадам өнжиж буй ч бөхчүүд тэгш ойн наадамдаа хэрхэн бэлтгэсэнээ дүгнэхээр хаалтын барилдаан хийж байна. Төв аймгийн Дүнжингарав дэвжээний бөхчүүд сорилго барилдаан зохион явуулахад дархан аварга А.Сүхбат, заан Б.Батмөнх, харцага Б.Даваабаатар тэргүүтэй бөхчүүд бяр хүчээ сорин өрсөлдлөө. Барилдаанд улсын цолонд ойрхон бөх болох аймгийн хурц арслан Б.Ууганбаяр түрүүлж, улсын харцага Ө.Даваабаатар үзүүрлэлээ.

Сонирхолтой нь дархан аварга Агваансамдангийн Сүхбат сорилго барилдаанд гурав давж, шөвгийн гуравт үлджээ. Барилдааны үеэр дархан аварга А.Сүхбатаас наадамд болсон бол барилдах байсан уу гэж асуухад "Хүний амьдралд тохиох сайхан мөчийн нэг нь тэгш ойн жилийн наадам байдаг. Гэхдээ эрдэнэт хүний эрүүл мэнд хамгийн чухал. 1000 бөхийн манлай болох сайхан. Энэ жил төр засаг, түмэн олноо хүндэтгээд наадам болсон бол барилдах байсан" хэмээн хэлжээ.