Монгол Улсын хэмжээнд энэ оны долоодугаар сарын 6-ны байдлаар вакцины нэгдүгээр тунд хүн амын 64.2 хувь, хоёрдугаар тунд 54.6 хувь нь хамрагджээ. Нийслэл болон орон нутагт 1.7 сая иргэний 81.8 хувь нь вакцины эхний тунг авсан бол хоёр дахь тунд 68.5 хувийг дархлаажуулжээ. Харин нийслэлд 1.6 сая иргэний 96.7 хувь нь нэгдүгээр тунд хамрагдсан бол 83.6 хувь нь бүрэн тунгаа авчээ. Тодруулбал, вакцинжуулалт эхэлснээс хойш зорилтот бүлгийн 97.8 хувийг дархлаажуулсан байна.

Гэвч дэлхий даяар коронавирусний аюултай шинэ хувилбарууд гарч ирж байгаа тул вакцины гуравдахь тунгаар зарим улс орон болох Турк, Бахрым, ОХУ, Арабын Нэгдсэн Эмират улс иргэдээ дархлаажуулж эхлээд байна.

Монгол Улс ч наймдугаар сараас 65-аас дээш насны иргэдээ “АстраЗенека” вакцинаар гуравдугаар тунг хийж, эхний ээлжид дархлаажуулахаар болжээ. Энэ талаар Эрүүл мэндийн яамны Нийтийн эрүүл мэндийн тусламжийн бодлогын хэрэгжилтийг зохицуулах газрын дарга Л.Энхсайхан “Нөөцөд хадгалсан цөөн тооны “АстраЗенека” вакцинаар гурав дахь тунг эхлүүлж, аравдугаар сараас Файзер вакцинаар дархлаажуулна. Тодруулбал, 12-17 насны хүүхдүүдийг нэг, хоёрдугаар тунд хамруулсны дараа нөөцөд үлдэх Файзер вакцинаар гурав дахь тунгийн дархлаажуулалтыг үргэлжлүүлнэ” гэлээ.

У.Тэргэл