Дархан-Уул аймгийн Биеийн тамир, спортын газрын дарга, гавьяат дасгалжуулагч Намсрайн Батлавтай ярилцлаа.

-“Токио-2020” олимпийн наадмын сагсан бөмбөгийн 3х3 төрөлд эх орноо төлөөлөн оролцох баг бүрэлдэхүүний тал дээр та ямар байр суурьтай байна вэ?

-Миний хувьд 3х3-ын шигшээ багт эхний дөрөвт багтсан тамирчин олимпийн наадамд өрсөлдөж, тав, зургаад байгаа нь оролцохгүй гэж ойлгосон. Тэгсэн нэг, хоёрт бичигдэж байсан манай Дарханы хоёр охин (Д.Ганзул, Б.Болор-Эрдэнэ)-ыг олимпод оролцуулахгүй болж, тэдний ард бичигдэж байгаа охидыг олимпод явуулах гэнэ. Ийм байж болохгүй. Энэ талаар МҮОХ-ны ерөнхийлөгчийн үүрэг гүйцэтгэгч Ч.Наранбаатар, Үндэсний шигшээ багийн зөвлөх дасгалжуулагч Ч.Насантогтох холбогдоход нарийн мэдээлэл өгөөгүй.  Үндэсний сагсан бөмбөгийн холбооны ерөнхийлөгч Ц.Цэвэрбал болохоор Д.Ганзул, Б.Болор-Эрдэнэ нар бэлтгэл хийх үедээ хоорондоо мөргөлдөж, хамар нь гэмтсэн гэж хэллээ.

-Ч.Наранбаатар дарга юу гэж байна?

-Би мэдэхгүй гэсэн. Бөөрөнхий юм ярьж байна. Би түүнд “Хэрэв энэ хоёр охиныг хасвал Олон улсын холбоонд хандана” гэдгээ хэлсэн. Дарханы охин уу, дэд сайдын охин уу гэдэгтээ биш, шилдэг нь л олимпод орох ёстой.

-Дарханы охидыг олимпод оруулахгүй байгаа шалтгааныг юу гэж харж байна?

-Олимпод оролцох болсон зургаан охины нэгийх нь аав дэд сайд, нөгөөхийнх нь аав Засаг дарга гэсэн мэдээлэл авлаа. Спорт шударга байх ёстой. 3х3 сагсан бөмбөгийн шигшээ багийн дасгалжуулагч С.Тулга ахмад багш нарынхаа зөвлөгөөг авах ёстой, гэтэл тэгдэггүй юм байна. Би маргааш Улаанбаатар руу явж, Дарханчуудын төлөө, хоёр охиныхоо төлөө эцсээ хүртэл тэмцэнэ. С.Тулга гэгч дасгалжуулагчтай хариуцлага тооцох ёстой. Тэр хүн сонгон шалгаруулалтынхаа талаар тайлбар хийх ёстой.

Б.Жаргал