Японы нийслэл Токио хотод зуны олимпийн наадам тав хоногийн дараа эхэлнэ. Энэ олимп сонирхол татсан үйл явдал, сонин хачнаар баялаг болох нь. Монголчууд ч энэхүү наадмыг анхдагч амжилтаар дүүрэн угтаж байна.

-Токиогийн олимпод 46 тамирчин өрсөлдөх болсон нь хамгийн олон тамирчинтай  оролцсон “Москва-1980”, “Рио-2016” олимпийн дээд амжилтыг ахиуллаа.

 -Токиог зорих Монголын   46, тамирчны гурав нь хөдөлмөрийн баатар, 12 нь гавьяат цолтон. Тэд бол О.Гүндэгмаа, С.Батцэцэг, Д.Сумъяа, М.Уранцэцэг, Э.Бэхбаяр, О.Бурмаа, Д.Амартүвшин, Л.Отгонбаатар, Ө.Дүүрэнбаяр, Б.Сэр-Од, Э.Цэндбаатар, М.Анхцэцэг нар юм.

-Монголын багийн тугчаар Ө.Дүүрэнбаяр, О.Хулан нарыг сонгосон. Жендэрийн тэгш байдлыг хангах, спорт, олимпизмийн хөдөлгөөнд эмэгтэйчүүдийн оролцоог нэмэгдүүлэх бодлогын хүрээнд сагсан бөмбөмбөгийн тамирчин О.Хуланг тугчаар сонгосон нь анхдагч үйл явдал.   

-Энэ удаагийн олимпийн наадамд Монголын баг тамирчид спортын 10 төрөлд өрсөлдөх нь бүх цаг үеийн дээд амжилт бөгөөд 3х3 сагсан бөмбөг, ширээний теннисний төрлөөр анх удаа олимпийн наадамд оролцох гэж байна.

-Токиогийн олимпийн наадмын байт харвааны төрөлд цэц сорих Бишиндээгийн Урантунгалаг Монголын багийн хамгийн ахмад (44 нас) нь бол хамгийн залуу нь ширээний теннисний төрөлд өрсөлдөх Б.Болор-Эрдэнэ 18 настай юм.  

-Монголын олимпийн багийн бүрэлдэхүүний 25 нь эмэгтэй. Үүнээс өмнөх бүх олимпод эрчүүд давамгайлж байв. Сагсан бөмбөгийн 3х3, чөлөөт бөхийн бүх жинд эрх авсан нь нөлөөлсөн. 

-"Токио 2020” олимпийн наадамд оролцох эрх авсан тамирчдын 27 нь анх удаа хүч үзэх юм. Харин Хөдөлмөрийн баатар, Бээжингийн олимпийн мөнгөн медальт О.Гүндэгмаа долоо дахь олимпдоо цэц сорино. Энэ нь Монголын олимпийн түүхэн дэх дээд амжилт билээ.

Б.Жаргал