Монголын баг тамирчид Японы нийслэл Токио хотод болсон зуны олимпийн наадамд 1964 онд анх оролцсон түүхтэй. Энэхүү олимпод монголчууд спортын таван төрөлд 21 тамирчнаа илгээж байлаа. Тэдний ёслолын хувцсыг тухайн үеийн Засгийн газрын захиалгаар Улсын оёдлын үйлдвэрийнхэн хийж, бүтээжээ.

Уг хувцас нь зузаан материалтайн дээр дулаан шингээдэг тул жагсаж явахад хүндрэлтэй байсан гэдэг. Үүнээс хойш тамирчдын хувцас жил ирэх тусам цаг үеэ даган шинэчлэгдэж, бэлгэдэл, агуулгынх нь утга улам төгөлдөржин, эд материалын хувьд ч чанаржсаар ирсэн. Тэгвэл Японы Токиогийн зуны XXXII олимпийн наадмын нээлтийн ёслолд Монголын баг тамирчид хаанахын, ямар хувцсаар жигдэрч оролцохыг сонирхуулъя. Баг тамирчид маань үндэсний үйлдвэрлэгч “Mishel&Amazonka” брэндийн урласан “Хийморь” нэртэй спорт хувцсаар “гангарах”-аар болжээ.

Бэлгэдлийг танилцуулбал, морины зулайг дүрсэлсэн хээг эвлүүлж, монгол босоо захтай хослолоор жигдрэх юм байна. Түүнчлэн медалийн тавцан болон тэмцээний бусад үед өмсөх чөлөөт хувцас, цүнх, малгай, салхины хамгаалалттай цамц зэргийг ч багтаажээ. Монголын баг тамирчид 1964 онд Токиогийн ууган олимпод оролцож байсан бол 57 жилийн дараа отгон олимпдоо ийнхүү багаараа, Монгол Улсын далбаан дор жагсах нь.

Токиогийн зуны XXXII  олимп цар тахлын үед, хатуу чанга дэглэмийн дор, үзэгчгүйгээр болж байгаагаараа онцлогтой юм. Монголын тамирчдын Токиогийн зуны олимпийн нээлтийн ёслолын жагсаалд өмсөх хувцастай танилцана уу. 

Б.Жаргал