ОХУ-ын Сочи хотод эмэгтэй шатарчдын дэлхийн цомын аварга шалгаруулах тэмцээн болж байгаа бөгөөд эх орноо төлөөлөн өрсөлдсөн их мастер, гавьяат тамирчин Батхуягийн Мөнгөнтуул шилдэг 32-т шалгарсан билээ. Тэгвэл их мастер маань өчигдөр тэмцээн зохион байгуулагч орны тамирчин Екатерина Лагнотой учраа тааран тоглож, харамсалтай нь хожидлоо.

Б.Мөнгөнтуул энэ давааны эхний өрөгт хожих гэж улайрсан нь оновчгүй болж, яван явсаар дийлдэв. Дараагийн өрөгт манай тамирчин өрсөлдөгчөө заавал хожих үүрэг авсан. Тэд харилцан довтлох гарааг сонгож тоглох нь үзүүштэй байсан ч эцэстээ тэнцээгээр өндөрлөсөн юм.  Ингээд хоёр тоглогчийн матчийн харьцаа 1,5, 0,5 болсоноор Б.Мөнгөнтуул дэлхийн цомын тэмцээнийг энэ хүргээд өндөрлүүллээ.

Зөвхөн өндөр зэрэглэлийн шатарчин оролцдог энэхүү тэмцээнд 103 шилдэг тамирчин ур ухаанаа сорин өрсөлдөж байна. Гавьяат тамирчин Б.Мөнгөнтуулын хувьд Дэлхийн шатрын холбооны ерөнхийлөгчийн цагаан хуудсын урилгаар оролцох эрх авсан юм.