Хэдхэн хормын өмнө зуны олимпын XXXII дахь наадмын жүдо бөхийн эхний өдрийн хэсгийн шатны барилдаанууд амжилттай болж өндөрлөлөө. Өнөөдөр эмэгтэйчүүдийн -48кг болон эрэгтэйчүүдийн -60кг жингийн барилдаанууд зохиогдож байгаа бөгөөд эмэгтэйчүүдийн -48кг жинд барилдсан МУГТ М.Уранцэцэг жингийнхээ шилдэг дөрвөн бөхийн нэгээр шалгараад байна. Тэгвэл түүний хамтаар шигшээ барилдаанд шалгарсан тамирчдыг амжилтынх нь хамтаар танилцуулж байна.
А хэсгийн аварга Дистриа Красники (Косово)
2015 оны залуучуудын ДАШТ-нд түрүүлснээр дэлхий дахинд танигдаж байсан түүний хувьд мэргэжлийн замналынхаа эхэн үед -52кг жинд барилддаг байсан ч нутгийн аварга М.Кэлмэнди тус жинд барилддаг тул жин бууж -48кг жинд барилдаж эхэлсэн. Тус шийдвэр нь ч түүнд зөвөөр нөлөөлсөн бөгөөд өдгөө дэлхийн чансааны эхний байрыг эзэмшиж байгаагаас гадна насанд хүрэгчдийн ДАШТ-ээс хүрэл медаль, Мастерсаас гурван алтан медаль гэх зэрэг томоохон амжилтуудын эзэн. Токиогийн дэвжээн дээр анхныхаа олимпын наадамд оролцож байгаа бөгөөд тун удахгүй манай улсын тамирчин Уранцэцэгтэй мөнгөн медалийн төлөөх барилдааныг хийнэ. Тэдний хоорондын харьцаа 2:2 байдаг.
B хэсгийн аварга Мөнхбатын Уранцэцэг (Монгол)
Монголын жүдо бөхийн түүхэн дэх хамгийн шилдэг бөхчүүдийн нэг бол яах аргагүй хэвтээ барилдааны хатан хаан М.Уранцэцэг билээ. Анх 2013 оны ДАШТ-нд түрүүлсэн цагаасаа хойш дэлхийн тавцанд тун жигд барилдсаар өдгөө дэлхийн аваргын дөрвөн медаль, Мастерс тэмцээний алтан медаль гэх зэрэг бүхий л том тэмцээний медалиудыг өөрийн цуглуулгадаа багтаасан. Тэгвэл түүнд байхгүй цор ганц медаль болох олимпын наадмын медаль хүртэхэд одоо түүнд нэг л ялалт хэрэгтэй. Дистриа Красникиг тэрээр энэ жилийн Будапештын ДАШТ-ий хүрэл медалийн төлөө торгуулиар ялж байснаас гадна 2018 оны Абу Дабигийн Гранд Сламын финалын барилдаанд даралтаар цэвэр ялж байсан. Харин 2019 оны Чиндаогийн Мастерс болон 2017 оны Хаагийн Гранд При (-52кг жинд) тэмцээнүүдэд ялагдал хүлээсэн.
C хэсгийн аварга Дариа Билодид (Украин)
Дөнгөж 20 настай хэдий ч аль хэдийнээ дэлхийн хошой аварга гэдэг тэр болгон тохиогоод байдаггүй ховор амжилт. Украин улсын хэдийгүй дэлхийн жүдо бөх сонирхогчдын хайртай бөх болоод буй түүний хувьд -48 кг жинд сүүлийн тэмцээндээ оролцож байна гэж хэлэхэд тэгж их буруутахгүй байх. Зөвхөн олимпын алтан медалийн төлөө Токиод ирсэн түүнийг энэ онд оролцсон гурван тэмцээндээ нэг ч түрүүлж чадалгүйгээр бүгдэд нь ялагдал хүлээсэн гэх сөрөг амжилт дагаж байна. Хэдхэн цагийн дараа эзэн орны бөх Фуна Тонакитай алтан медалийн төлөө шалгарах эрхийн төлөө барилдах бөгөөд тэдний хоорондын харьцаа 4:1 байдаг бөгөөд Украин охин илүүрхдэг.
D хэсгийн аварга Фуна Тонаки (Япон)
Жүдо бөхийг үндэслэгч орны үзэгчдийн хувьд эхний өдөр хос алтан медалийг баг тамирчдаасаа хүлээж байгаа гэдэг нь мэдээжийн хэрэг. 2017 оны ДАШТ-ээр амжилттай барилдаж дэлхийн аварга гэх хүндтэй алдрын эзэн болсон тэрээр 2018 болон 2019 оны ДАШТ-үүдээр мөн л тогтвортой сайн барилдсан ч финалын барилдаануудад одоо нүүр тулах Дариа Билодидод ялагдал хүлээж байсныг та бүхэн санаж байгаа байх. Нэг ёсондоо өндөр нуруутай хүнтэй барилдаан таардаггүй түүний хувьд нутаг дээрээ түүнийг зайлшгүй ялах ёстой бөгөөд сүүлийн жил гаруйн хугацаанд зөвхөн энэхүү чухал барилдаанд зориулан бэлтгэл хийсэн нь тодорхой. Түүнийг ямар арга барилаар барилдаж мөн гэртээ юу бэлдэж ирсэн бэ? Гэдгийг харах л үлдлээ.
Тус тамирчид энэ шатны барилдаандаа ялагдал хүлээсэн ч дагах барилдаан хийж гарч ирэх тамирчидтай хүрэл медалийн төлөө барилдана.
Д.Жаргал
