Монголын боксын холбооны Бага хурал өчигдөр болж, холбооны 15 дахь ерөнхийлөгчөөр Хууль зүйн сайд Х.Нямбаатар сонгогдов. Тэгвэл тус холбооны 14 дэх ерөнхийлөгч Хөдөлмөрийн баатар Т.Мөнхбаяр үүрэгт ажлаа өгсөний дараа хэлсэн үгийг хүргэж байна.

-Би Монголын боксын холбооны ерөнхийлөгчөөр 2021 оны нэгдүгээр сарын 28-ны өдрийн Удирдах зөвлөлийн өргөтгөсөн хурлаар сонгогдон ажилласан. Дэлхий нийтийн өргөн тархсан “ковид-19” цар тахлын хүндрэлтэй үед бид өөрийн нөөц бололцоогоо дайчлан Биеийн тамир, спортын улсын хороотой хамтран бэлтгэл сургуулилт, тэмцээн уралдаанд хичээл зүтгэл гарган өдийг хүртэл ажиллаж ирсэн. Ерөнхийлөгчийн ажлыг хүлээн авсан өдрөөс хойш би 500 сая төгрөгийн санхүүжилтийг хувиасаа гарган шийдвэрлэсэн. Энэ гаргасан зардлын үр дүнд Азийн АШТ-ээс олон алтан медальтан төрөн гарч залуучуудын шигшээ багийн тамирчид ДАШТ-ээс хос медаль авсан зэрэг маш олон ажил хийж хэрэгжүүллээ. Мөн гавьяат дасгалжуулагч Х.Алтанхуягийн нэрэмжит тэмцээнийг зохион байгуулахад өөрийн зүгээс зардал мөнгийг нь 100 хувь шийдэж өгсөн боловч цар тахлын улмаас тэмцээн цуцлагдсан билээ.

Түүнчлэн Герман улсаас “Тоp Тen” загварын ринг, 100 ширхэг толгойны хамгаалалт, 50 лап, 200 ширхэг боксын бээлий болон өмнөх ерөнхийлөгч Д.Бат-Эрдэнийн авч байсан эд материалын гаалийн зардлыг шийдэж өгсөн.

Цагаан сараар ахмадууддаа хишиг болгож тодорхой тооны хүнд бэлэг гардуулсан бөгөөд Польш улсад болсон залуучуудын ДАШТ-д явсан тамирчдын Станбулд саатсан хугацаанд байр, хоолны зардлыг шийдсэн. Саяхан болсон олимпын наадамд илүү олон тамирчин оролцуулах боломжтой байсан ч Франц улсад болохоор төлөвлөсөн олимпын эрхийн тэмцээн цуцлагдсан. Би энэ богино хугацаанд ажиллахдаа боксын хамт олондоо анхны эмэгтэй гавьяат тамирчин шагналыг М.Нандинцэцэгт, Э.Цэндбаатартаа бас гавьяат тамирчин цол тэмдэг авч өгөхөд дээш нь уламжилж зохион байгуулсан. Бид боксынхоо дасгал сургуулилтанд бүрэн өөрчлөлт оруулахгүй бол болохгүй юм байна. Миний ажигласнаар багш, тамирчдын болон холбооны гишүүдийн ёс зүйн асуудал маш ихээр гарч ирдэг. Энэ бүхнийг шинэчилж, шинэ уур амьсгалаар цэнэглэхгүй бол болохгүй юм байна. Манай боксын холбоо ийм өргөтгөсөн хурал хийгээгүй олон жил болжээ. Та бүхэндээ баярлалаа гэж хэлэв.