Сонирхогчдын боксын насанд хүрэгчдийн ДАШТ-д манай улсаас есөн ширэн бээлийтэн оролцох бөгөөд бэлтгэл сургуулилтаа Эрдэнэт хотын Сэлэнгэ амралтын баазад хангаж байгаа. Тэгвэл өчигдөр МБХ-ны Удирдах зөвлөлөөс дэлхийн рингэнд тулалдах Монголын баг бүрэлдэхүүнийг танилцууллаа. Гэвч энэ танилцуулгад ДАШТ-д оролцох эрхээ авсан хоёр тамирчны нэр байсангүй.

Учир явдлыг тодруулахад 57 кг-ын жинд эх орноо төлөөлөх байсан Б.Буяндалайгийн оронд Х.Энх-Амар, 63 кг-ын жинд Б.Төгөлдөрийн оронд Б.Мишээлт нар Белградыг зорихоор болсон байна.

Дэндүү харамсалтай мэдээ.

Шалтгаан нь Б.Буяндалай, Б.Төгөлдөр нар бэлтгэлийн дундуур коронавирусний халдвар авсан гэнэ. Аз болоход Сэлэнгэ амралтын баазад бэлтгэл сургуулилтаа хийж буй бусад тамирчдаас сэжигтэй тохиолдол гараагүй байна. Ковид туссан хоёр тамирчин өдгөө Улаанбаатарт хэвтэн эмчлүүлж байгаа аж.

Тэгвэл өчигдөр сорилд оролцох байсан нэг тамирчин хугацаандаа ирж амжаагүйгээс мөн хасагдлаа. Манай гол найдвар болох гавьяат тамирчин Э.Цэндбаатар жин үзлэгтээ амжиж ирээгүй юм. Уг нь түүнд спортын ашгийн үүднээс боломж гаргаж өгсөн билээ.

“Белград-2021” боксын ДАШТ-д Монгол Улсыг төлөөлөн өрсөлдөх тамирчдыг танилцуулая:

48 кг-ын жинд ОУХМ Г.Ган-Эрдэнэ,

51 кг-д ОУХМ Х.Энхмандах,

54 кг-д Э.Баярсайхан,

57 кг-д Х.Энх-Амар,

60 кг-д О.Тулга,

63 кг-д Б.Мишээлт,

67 кг-д Б.Чинзориг,

71 кг-д О.Бямба- Эрдэнэ,

75 кг-д гавьяат тамирчин У.Мөнх-Эрдэнэ нар оролцоно.

Б.Жаргал