Монгол Улс, Оросын Холбооны Улсын найрсаг харилцаа, дайчин нөхөрлөл, цэргийн хамтын ажиллагаанд томоохон байр суурийг эзэлдэг “Сэлэнгэ-2021” байлдааны буудлагатай тактикийн сургуулийг өнгөрсөн сарын 20-ны өдрөөс манай улсын нутаг дэвсгэрт зохион байгуулж, өнөөдөр амжилттай өндөрлөж байна. Сургуулийг “Терроризмын эсрэг хамтарсан операцыг зохион байгуулах” сэдвийн дор 14 хоногийн хугацаанд явуулсан ба Монгол Улс, Оросын Холбооны Улсын Зэвсэгт хүчний 1200 гаруй цэргийн алба хаагч, 200 орчим байлдааны зэвсэг, техник оролцсон юм.
Энэ сарын 4-ний өдөр “Сэлэнгэ-2021” сургуулийн үйл ажиллагаатай Монгол Улсын Ерөнхий сайд Л.Оюун-Эрдэнэ, Батлан хамгаалахын сайд Г.Сайханбаяр, ОХУ-аас Монгол Улсад суугаа Онц бөгөөд Бүрэн эрхт Элчин сайд Искандер Кубарович Азизов, Үндэсний аюулгүй байдлын зөвлөлийн нарийн бичгийн дарга Ж.Энхбаяр, УИХ-ын гишүүн, Аюулгүй байдал, гадаад бодлогын байнгын хорооны дарга Б.Баттөмөр, УИХ-ын гишүүн Н.Энхболд, Д.Цогтбаатар, ЗХЖШ-ын дарга, дэслэгч генерал Д.Ганзориг, ГХЯ-ны Төрийн нарийн бичгийн дарга Н.Анхбаяр, Хөрш орнуудын газрын дэд захирал Б.Болор болон албаны бусад хүмүүс танилцлаа. Хоёр орны хамтарсан энэхүү хээрийн сургууль нь Монгол Улсад Ардын хувьсгал ялсны түүхт 100 жил, орчин цагийн Зэвсэгт хүчний 100 жил, Монгол Улс, Оросын Холбооны Улс хооронд дипломат харилцаа тогтоосны 100 жил, Чөлөөлөх дайны ялалтын 76 жилийн ойн хүрээнд зохион байгуулагдсанаараа онцлогтой байлаа.
Сургуулийн удирдагчаар Монголын талаас Зэвсэгт хүчний Хуурай замын цэргийн штабын дарга, бригадын генерал Л.Онцгойбаяр, ОХУ-ын талаас Дорнодын цэргийн тойргийн 36 дугаар армийн командлагчийн үүрэг гүйцэтгэгч, хошууч генерал И.Б.Тимофеев нар үүрэг гүйцэтгэж, сургуулийн зорилгыг бүрэн хангаад байна. Энэхүү сургуулийг жил бүр зохион байгуулснаар хоёр улсын найрсаг харилцааг бататган бэхжүүлэх, цэргийн хамтын ажиллагааг өргөжүүлэн хөгжүүлэх, алба хаагчдын ур чадварыг дээшлүүлэх, бэлэн байдлын түвшнийг сайжруулах, харилцан туршлага солилцох, сургуульд оролцож буй бие бүрэлдэхүүний ёс суртахуун, сэтгэлзүй, бие бялдрын бэлтгэлжилтийг дээшлүүлэх зэрэг чухал ач холбогдолтой юм.
