2020 оны Улсын баяр наадамд шөвгөрсөн Н.Батсуурь, Р.Пүрэвдагва, Б.Бат-Орших нараас допинг илэрч, дараа нь тэд хориотой эмийн бодис хэрэглэснээ хүлээн зөвшөөрч байлаа. Үүний дараа дээрх бөхчүүдийн барилдах эрхийг хоёр жилээр хассан удаатай.Нэг бөхийн цолыг хурааж, нөгөө хоёрынх нь чимгийг хасч байв. Угтаа бол тэд 2022 он хүртэл албаны ёсны тэмцээн уралдаанд оролцох эрхгүй гэсэн үг. Гэвч Н.Батсуурь аварга Узбекистаны нийслэл Ташкент хотод болж буй самбо бөхийн ДАШТ-д барилдаж, 98 кг-ын жинд хүрэл медаль хүртжээ.

Хэрэв түүний барилдах эрхийг сэргээгээгүй тохиолдод олон улсын тэмцээнд оролцсон бол шийтгэл нь мэдээж хүндэрнэ. Н.Батсуурь их спортын төрлөөр хичээллэж байсныхаа хувьд үүнийг хамгийн сайн мэдэх учиртай. Тэрбээр Баяр наадам зохион байгуулах хорооны Үндэсний бөхийн салбар хорооноос гаргасан саналд үндэслэн барилдаж байж болох юм. Тус салбар хороо нь өнгөрсөн оны аравдугаар сард хуралдахдаа допинг хэрэглэсэн гэх дээрх гурван бөхийн барилдах эрхийг 11 сараар буюу 2021 оны долдугаар сарын 1 хүртэл хасах санал гаргасан юм. Энэ санал түүнд барилдах боломж олгожээ гэж үзье.

Гэхдээ нөгөө талдаа МҮБХ-ноос “Дээрх шийдвэр нь монгол бөхөд маш их хор нөлөөтэй шийдвэр гэдгийг та бид сайн мэдэж байгаа бөгөөд олонхийн саналаар шийдвэрлэсэн гэх шийдвэрээ эргэн харж шударга шийдвэр гаргахаар салбар хороогоо хуралдуулахыг хүсье” хэмээн албан мэдэгдэл гаргасан юм. Допинг хэрэглэсэн Н.Батсуурь, Р.Пүрэвдагва, Б.Бат-Орших нарыг өнгөрсөн зун болсон 512 бөхийн барилдаанд оролцуулаагүй нь МҮБХ-ны допингийн эсрэг хатуу байр суурь хэвээрээ гэж харж болохоор байна. МҮБХ-ны тэргүүн Ц.Магалжав саяхан хэвлэлд ярилцлага өгөхдөө допинг хэрэглэсэн бөхийн толгойг илэхгүй хэмээн хэлж байлаа.

Б.Жаргал