АНУ-ын Дээд шүүх даваа гарагт Дональд Трампын Цагаан ордны шинэ бүжгийн танхим барих төслийг үргэлжлүүлэх боломж олгож, уг бүтээн байгуулалтыг зогсоохыг шаардсан түүхэн барилга хамгаалагчдын нэхэмжлэлийг хүлээж авсангүй. Шүүхийн шийдвэр 5-4 харьцаатай гарсан бөгөөд Ерөнхий шүүгч Жон Робертс болон шүүхийн либерал үзэлтэй гурван шүүгч эсрэг байр суурьтай байв.

Шүүхийн олонхийн гаргасан гарын үсэггүй, найман хуудас шийдвэрт Цагаан ордны шинэ танхимын төсөл хууль ёсны эсэх талаар эцсийн дүгнэлт өгөөгүй байна. Харин төслийг эсэргүүцэн шүүхэд хандсан Үндэсний түүхэн дурсгал хамгаалах байгууллага (National Trust for Historic Preservation) уг төслийн улмаас шууд, бодит хохирол амссан гэдгээ нотлоогүй тул шүүхэд нэхэмжлэл гаргах эрх буюу “standing” хангалтгүй гэж үзжээ.

Ингэснээр Трампын засаг захиргаа Цагаан ордны зүүн жигүүрийн оронд барьж буй бараг 90 мянган ам метр талбайтай шинэ бүжгийн танхимын барилгын ажлыг үргэлжлүүлэх боломжтой болж байна. Трамп уг төслийг ерөнхийлөгчийн бүрэн эрхийнхээ томоохон өвийн нэг гэж үзэж байгаа бөгөөд үндэсний аюулгүй байдалд чухал ач холбогдолтой хэмээн тайлбарлаж ирсэн байна.

Харин Ерөнхий шүүгч Жон Робертс шийдвэрийг эрс эсэргүүцэж, барилгын ажил “хууль бус байх магадлалтай” гэж үзжээ. Түүний байр суурийг шүүхийн гурван либерал шүүгч дэмжсэн байна. Робертс Конгрессын зөвшөөрөлгүйгээр Цагаан ордныг ийм хэмжээгээр өөрчлөн барих нь хууль тогтоох байгууллагын эрх мэдэлд халдсан хэрэг байж болзошгүй гэж анхааруулжээ. Тэрээр Цагаан ордон бол ердийн нэг барилга биш бөгөөд түүний түүхэн болон бэлгэдлийн ач холбогдлыг харгалзах ёстой хэмээн үзсэн байна.

Трампын засаг захиргаа шинэ танхимыг ойролцоогоор 400 сая ам.долларын өртгөөр барина гэж мэдэгдсэн. Тус танхимд 1,000 орчим хүн хүлээн авах боломжтой бөгөөд газар доорх цэргийн байгууламж, хамгаалалтын зориулалттай хэсгүүдтэй хамт баригдаж байгаа аж. Дээд шүүхийн шийдвэр нь Трампын хувьд томоохон ялалт болсон ч танхимын төсөл хууль ёсны эсэхтэй холбоотой бусад маргаан доод шатны шүүхүүдэд үргэлжилж байна.