АН-ын 4-11 уулзалт Яармагт баригдаж байгаа 300 ортой эмнэлэгт боллоо.

Уулзалтад АН-ын Ерөнхий нарийн бичгийн дарга Ц.Оюундарь, Барилгын хөгжлийн төвийн захирал Б.Баярсайхан, Барилга хот байгуулалтын дэд сайд Г.Байгальмаа нар оролцож, сэтгүүлчдэд мэдээлэл өгсөн юм.

Өнөөдрийн хурлаар Яармагийн дэнжид баригдаж байгаад ажил нь зогссон 300 ортой, эх нялхсын эмнэлэг болон ахмадын сувилал, архивын төв газрын барилгын талаар онцоллоо.

Тус барилгуудын тендер анх 2010 онд зарлагдаж,  Б.Ганзориг захиралтай “Нийслэл Өргөө” компани ялж барилгын ажлыг гүйцэтгэхээр болсон байна. Тус компани төсөвт өртгийн 89-93 хувийг буюу нийт 18 тэрбум төгрөгийг улсын төсвөөс санхүүжилтээр авсан байна. Гэвч дээрх барилгуудын ажил одоог хүртэл бүрэн дуусаагүй бөгөөд төсвийн анхны дүнг 38-69 хувиар өсгөсөн байна. Учир нь төсвөөс баталж өгсөн 18 тэрбум төгрөг нь уг барилгыг барьж дуусгахад хүрэлцээгүй байна. Тиймээс одоо уг барилгыг дуусгахын тулд нийт 14 тэрбум 220 сая гаруй сая төгрөг хэрэгтэй байгаа аж.

Харин 14 тэрбум төгрөгийг улсөөс өгөх, үгүй нь тодорхойгүй байгаа юм. Албаны хүмүүсийн хэлж буйгаар 2014 оны төсвийн тодотголоор хэлэлцүүлж, УИХ-аар оруулж байж асуудлыг шийдвэрлэх юм байна. Тэгэхээр уг эмнэлэгийн барилгын ажил дуусах үгүй нь ирэх оны төсвийн тодотголоор орж байж шийдвэрлэгдэнэ гэсэн үг.

Барилгын ажлыг гүйцэтгэсэн компанийн захирлын хэлж буйгаар барилга баригдах явцад барилгын материалын үнэ болон ажилчдын цалин хөлс хэд дахин өссөнөөс болж төсөвлөгдсөн мөнгө нь хүрэлцээгүй гэнэ.

Хэрвээ улсаас 14 тэрбумын нэмэлт санхүүжилтыг гаргаад өгчихвөл барилгын ажлыг удахгүй дуусгах бүрэн боломжтой гэж тэрээр хэлсэн юм. Үүнээс гадна эдгээр барилгын ажил зогсох болсон бас нэгэн шалтгаан нь дэд бүтцийн асуудал юм. Тодруулбал тус барилга нь дулаан болон халуун хүйтэн усны шугамд холбогдоогүй, зам, дэд бүтэц нь шийдэгдээгүй байхад баригдсан. Тэгсэн мөртлөө барилгаа барьчихсан байгаа нь анхнаасаа зураг төсөл, судалгааны ажил нь муу хийгдсэн байсан гэдгийг илтгэж байгаа юм. Мөн тус компани нь зөвхөн барилгын ажлыг л гүйцэтгэх юм байна. Түүнээс дулааны шугам сүлжээнд холбогдох тендерийг өөр компани хийж байгаа аж.

Барилга хөгжил төвийн захирал Б.Баярсайхан энэ талаар ярихдаа “Анхнаасаа 18 тэрбумаар босгоно гэж тендерт ялчихаад одоо нэмэлт 14 тэрбум төгрөг нэхээд байгаа. Тэгэхээр нэхсэн мөнгийг нь өгөх асуудалтай ” гэсэн юм.

Мөн ямар ч судалгаагүйгээр төсөв зохиогоод тендер зарладаг байдал ийм байдалд оруулж байна гэж зарим албаны хүмүүс хэлж байсан юм.

Энэ мэтчилэн олон жил он дамжиж хэрэгжиж байгаа, төсөвт өртөг нь нэмэгдсэн, гүйцэтгэх хугацаа нь удааширсан  110 барилга байгууламжуудыг төсвөөс хасч, царцаахыг АН-ын бүлэг үзэж байгаа юм байна. Учир нь эдгээр барилгуудын төсөвт өртөгийг нь эргэн шалгаж, аудитын шалгалт хийж үзэх шаардлагатай гэж үзэж байгаа аж. Мөн АТГ, Мэргэжлийн хяналтын ерөнхий газрын шалгалтыг хийлгүүлж байгаа юм байна.

Тиймээс мэргэжлийн байгууллагуудын албан ёсны дүн гартал тус 110 барилгын ажлыг царцаахаар болжээ.

АТГ нэр бүхий 110 төсөлд Сангийн яам, Эдийн засгийн хөгжлийн яам, Мэргэжлийн хяналтын ерөнхий газартай хамтран шалгахад 110 төслөөс 2012-2013 онд зөвхөн зургаан барилгыг л улсын комисс хүлээн авсан байна. Харин бусад нь дуусаагүй буюу нэмэлт санхжүүжилт шаардаж байгаа юм. Тухайлбал анхны төсөвт өртөгөө бүрэн авсан хэрнээ 2014 оны төсөвт нэмж хөрөнгө тусгуулсан 16, төсөвт өртгийнхөө 90-ээс дээш хувийн санхүүжилтийг авсан атлаа ирэх оны төсөвт нэмж хөрөнгө тусгуулахаар санал өгсөн 15, 2014 оны төсөвт хөрөнгө тусгуулахаар илрүүлсэн санал нь анхны төсөвт өртгийн дүнгээс хоёр дахин ба түүнээс дээш хэмжээгээр нэмэгдсэн 29 төсөл байгааг АТГ тогтоожээ.

Төсөвт суусан барилгууд он дамжин санхүүжилт нэмдэг нь хэд хэдэн шалтгаантай байдаг аж.

Тодруулбал,

-Зураг, төсөв нь батлагдаагүй төслийг төсөвт тусгаж батлуулах
-Брилгын зураг, төсвийг анх хийхдээ зарим ажлыг орхигдуулснаас нэмэлт төсөв хийлгэх
-Материал, тээврийн зардал өссөн нэрээр шинээр төсөв хийлгэхдээ өмнөх гүйцэтгэлд орсон барилгын ажилтай уялдуулж тооцохгүй байх
-Гүйцэтгэгч байгууллагууд гэрээнд заасан хугацаанд барилгын ажлыг гүйцэтгээгүй
-Захиалагч, ашиглагч байгууллагын зүгээс төслийн гүйцэтгэлийн хяналтыг хангалтгүй хэрэгжүүлсэн
-Зураг, төсөв хийдэг байгууллагуудын үйл ажиллагааг хянадаггүйгээс ижил төрлийн барилгын төсөв харилцан адилгүй дүнтэй зохиогдсон зэргээр төсвөөс санхүүжилтээ авсан хэрнээ дахин нэмэлт хөрөнгө шаарддаг байна.