АТГ-аас өнөөдөр сэтгүүлчдэд мэдээлэл хийлээ. Хурлын эхэнд ашиг сонирхлыг зөрчил, хууль бус томилгоотой холбоотой томоохон хэргүүдийн талаар танилцууллаа. Үүнд:

Хууль бус томилгоодыг ЗГХЭГ-т мэдүүлжээ

Татварын Ерөнхий газрын дарга Т.Батмагнайн томилгоо хууль бус болсоныг АТГ-аас тогтоосон билээ. Төрийн албаны зөвлөл ч үүнтэй санал нэгдсэн дүгнэлт гаргасан бөгөөд өнгөрөгч дөрөвдүгээр сард энэ асуудлыг Засгийн газрын хэрэг эрхлэх газарт хүргүүлсэн байдаг. ЗГХЭГ-т шилжээд хоёр сар гаруйн хугацаа өнгөрсөн ч дээрх асуудал шийдэгдээгүй хэвээр байна.

Түүнчлэн ТЕГ-ын дарга Б.Ариунсан мөн тус газрын удирдлагад тавигдах шаардлагыг хангаагүй болон урьдчилсан мэдүүлгээ буруу өгсөн зэрэг нь тогтоогджээ. Тиймээс Авлига ашиг сонирхлын хуулийг зөрчсөн гэдэг үндэслэлээр албан тушаал бууруулах буюу хариуцлага тооцуулахаар Засгийн газрын хэрэг эрхлэх газарт хүргүүлээд байгаа аж.

Мөн Өмнөговь аймгийн засаг дарга Бадраа худалдан авах ажиллагааны даргыг хууль тогтоомж зөрчин томилсон нь тогтоогджээ. Үүнтэй холбоотойгоор мөн төрийн албаны зөвлөлөөс сонгон шалгаруулалт явуулаагүй шаардлага хангаагүй этгээдийг томилсон байна гэдэг дүгнэлтийг ирүүлжээ. Энэ асуудлаар АТГ-аас Өмнөговь аймгийн Засаг даргад удаа дараа хандсан боловч энэ асуудал шийдвэрлэгдээгүй байна. Тиймээс АТГ-аас энэ асуудлыг Засгийн газрын хэрэг эрхлэх газарт тавьжээ.

Мөн энэ үеэр тус газар шалгагдаж байгаа хэргүүдийн талаар мэдээлсэн юм.

Ерөнхий сайдын зөвлөх Л.Гансүхыг 3,6 тэрбум төгрөг шамшигдуулсан хэргээр шалгаж байна

Ерөнхий сайдын ахлах зөвлөх Л.Гансүх нарт холбогдох асуудлаар АТГ эрүүгийн хэрэг үүсгэж шалгаж эхэлсэн. Одоогоор Л.Гансүхийг уг хэрэгт сэжигтнээр тооцон шалгаж байгаа юм. Тэрбээр нийслэлийн иргэдийг нүүрсээр хангах “Нүүрс” хөтөлбөрийг хэрэгжүүлэхдээ ямар нэгэн тендер зарлалгүйгээр “Эм Жи Эл Эс Би” компаниар дүүрэг, хороодод нүүрс хүргэх ажлыг хийлгэсэн. Түүгээрээ дамжуулан урьдчилсан байдлаар 3,6 тэрбум төгрөгийг завшсан байж болзошгүй хэмээн шалгаж байгаа юм. Энэ хэрэгт түүнийг  УИХ-ын гишүүн, Байгаль орчны сайдаар ажиллаж байх хугацаанд нь туслахаар нь ажиллаж байсан хүмүүс, өөрийнх нь эхнэрийн төрсөн дүүгийн хүүхэд зэрэг ах дүү төрөл садны болон бусад хамаарал бүхий этгээдүүд оролцсон байж болзошгүй юм байна. Шалгалт үргэлжилж байгаа аж.

Тавантолгойн захирал асан Х.Түмэнбаяр хувийн колонкоороо шатахуун түгээжээ

Тавантолгой компанийн захирал асан Х.Түмэнбаярт холбогдох хэргийн мөрдөн байцаалтын ажиллагаа явагдаж байгаа бөгөөд хараахан дуусаагүй байгааг хэллээ. Тодруулбал тэрбээр Тавантолгой компанийн захиралаар ажиллаж байх үедээ уг компанийн хөрс хуулалтын ажил явуулж байсан бусад аж ахуй нэгжийн тээврийн хэрэгслүүдэд компанийнхаа талбай дээр суурилуулсан өөрийнхөө хувийн колонкоор дамжуулж шатахуун түгээж байсан аж. Мөн энэ аргаараа тодорхой байгууллага, аж ахуй нэгжүүдэд их хэмжээний хохирол учруулсан байж болзошгүй асуудлаар шалгалт үргэлжилж байгааг хэлсэн юм.

ИНЕГ-ын удирдлагуудын хэрэгт яллах дүгнэлт үйлдүүлнэ

Иргэний нисэхийн ерөнхий газрын дарга асан С.Батмөнх тэргүүтэй хэд хэдэн хүнийг албан тушаал, эрх мэдлээ урвуулсан хэрэгт холбогдуулан АТГ-т шалгаж эхлээд нэлээд хугацаа өнгөрсөн. Харин өнөөдрийн мэдээллээр тэдний хэрэгт яллах дүгнэлт үйлдүүлэхээр прокурорт шилжүүлсэн гэдгээ мэдэгдлээ.  С.Батмөнх нар өөрийн байгууллагад харьяалалгүй олон хүнд 14 тэрбум төгрөгийн орон сууц, орон сууцны дэмжлэг үзүүлсэн, гадаад томилолтын зардлыг даасан зэрэг хэд хэдэн хууль бус үйлдэлд холбогдоод буй юм. Тэдний мөнгө санхүүтэй холбоотой хэргийг шалгаж буй бол Өмнөговь аймгийн нисэх буудлын хөөрөх, буух зурвас шаардлага хангаагүй байхад хүлээн авсан гэх хэргийг нь хэрэгсэхгүй болгосон юм байна.