Улсын Дээд шүүхийн хяналтын шатны эрүүгийн хэргийн шүүх хуралдаанаар 2014 оны 9 дүгээр сарын 12-ны өдөр нийт 24 хэрэг хянан хэлэлцсэний дотор Вэй Хун Ван, Хан Рун Пин, Д.Нанжидсүрэн, А.Мэндбат нарт холбогдох эрүүгийн хэрэг багтав.

Вэй Хун Ван нь “Хунлиан” ХХК-ийн захирлаар ажиллаж байхдаа Хан Рун Пин, А.Мэндбат нартай хамтран давтан үйлдлээр 2008-2011 онуудад БНХАУ-аас өөрийн компанийн нэр дээр 3645 мотоцикль, 3251 ширхэг сэлбэг, Монгол Улсын гурван иргэний нэрээр 8177 мотоцикль буюу нийт 11822 ширхэг мотоциклийг Монгол Улсад импортоор оруулж ирээд худалдан борлуулахдаа компанийнхаа ахуйн нэгжийн орлогын албан татварын болон нэмэгдсэн өртгийн албан татварын тайланд тусгахгүй 485 сая 743 851 төгрөгийн буюу онц их хэмжээний албан татвар төлөхөөс санаатай зайлсхийсэн гэмт хэрэгт холбогджээ.

Мөн Баянзүрх дүүргийн Татварын хэлтсийн татварын улсын байцаагч Д.Нанжидсүрэнг 2010 оны 7 дугаар сарын 15-ны өдөр /24/10/0961 дугаартай Татварын хяналт шалгалт хийх томилолтын дагуу “Хунлиан” ХХК-д төлөвлөгөөт шалгалт хийхэд нь онц их хэмжээний татвар төлөхөөс зайлсхийсэн үйлдлээ нуун дарагдуулахын тулд түүнд 2010 оны 11 дүгээр сард 1 сая 500 000 төгрөгийн хээл хахууль өгч, 2010 оны 11 дүгээр сарын 10-ны өдөр №241723 дугаартай акт бичүүлсэн, мөн “Хунлиан” ХХК-ийн ашиг сонирхлын үүднээс татварын улсын байцаагч Д.Нанжидсүрэнд албан үүргийн хувьд гүйцэтгэх ёсгүй 2011 оны 1, 2, 3 дугаар сарын тайланг гаргуулж, Ч.Ууганцэцэгээр зуучлуулан 450 000 төгрөгийн хээл хахууль өгсөн аж.

Дүүргийн Эрүүгийн хэргийн анхан шатны 1 дүгээр шүүх 2014 оны 3 дугаар сарын 14-ний өдөр дээрх хэргийг анхан шатны журмаар хянан хэлэлцээд прокуророос А.Мэндбатад Эрүүгийн хуулийн 166 дугаар зүйлийн 166.2 дахь хэсэгт зааснаар яллах дүгнэлт үйлдэж ирүүлсэн хэргийг гэмт хэргийн бүрэлдэхүүнгүй гэсэн үндэслэлээр хэрэгсэхгүй болгож, түүнийг цагаатгасан байна. Харин Вэй Хун Ван, Хан Рун Пин нарыг бүлэглэн, давтан үйлдлээр татвараас зайлсхийж онц их хэмжээний хохирол учруулсан, Д.Нанжидсүрэнг хээл хахууль авсан, Вэй Хун Ванг хээл хахууль өгсөн гэмт хэрэг үйлдсэн гэм буруутайд тус тус тооцжээ. Ингээд Вэй Хун Ванд 6 жил 6 сар, Хан Рун Пинд 5 жил 1 сар, Д.Нанжидсүрэнд төрийн албанд ажиллах эрхийг 2 жилийн хугацаагаар хасч, 1 жил 6 сар хорих ял тус тус оногдуулсан байна.

Эрүүгийн хэргийн давж заалдах шатны 10 дугаар шүүх уг хэргийг 2014 оны 5 дугаар сарын 29-ний өдөр хянан хэлэлцээд анхан шатны шүүхээс тэдэнд оногдуулсан ялыг хэвээр үлдээсэн юм.

Улсын Дээд шүүхийн хяналтын шатны эрүүгийн хэргийн шүүх хуралдаанаар дээрх хэргийг хянан хэлэлцээд анхан болон давж заалдах шатны шүүхийн шийдвэрийг хэвээр үлдээлээ.