Дэлхийн ихэнх улс орны хэрэглэгчид цахим хаягтай болсон. Гэтэл интернэт хэрэгслийг ашиглан ард иргэдээ тагнаж чагнадаг гэх дуулиан тасрахгүй байна. АНУ иргэдээ тагнадаг байсан нь илэрсэн. Тэр ч бүү хэл бусад улсуудын төрийн тэргүүнүүдийг ч чагнасан гэх ичгэвэртэй хэрэг гарсан.  Тэгвэл Монгол Улс ч мөн иргэдээ тагнаж чагнадаг гэсэн мэдээлэл байна. Энэ талаар ингэж бичжээ.

    Викиликс /Wikileaks.org/ сайт тагнаж, чагнахад ашигладаг цахим хяналтын систем худалдаж авсан үйлчүүлэгч орнуудыг нэрлэжээ.

Финфишер (FinFisher ) компанийн дотоод сүлжээнд нэвтэрч, тагнах, чагнах, мэдээлэл хуулах, яриаг  замаас нь чагнах тагнуулын зориулалттай програм, хяналтын системийг худалдан авсан орнуудын тоонд Монгол улс багтжээ. Монгол Улс 2010 оны есдүгээр сараас 2013 оны арваннэгдүгээр сар хүртэлх хугацаанд FinSpy, FinFly USB, FinUSB Suite, FinFly ISP, FinIntrusion Kit, FinFireWire, FinFly LAN, FinFly Web зэрэг программ хангамжийн системийн лицензийг худалдан авч, үүнийхээ төлөө 1.358.160 евро төлсөн байна. Викиликс сайтад энэ талаар “Финфишерийн үйлчүүлэгчдээс хамгийн нөлөө бүхий орны нэг нь Монгол Улс гэдгийг анзаарахгүй өнгөрч болохгүй. Монгол Улс саяхан Цахим эрх чөлөө эвслийг даргалах орноор сонгогдсон нь санамсаргүй тохиолдол биш” гэж бичжээ.
Эх сурвалжуудын мэдээлж буйгаар ийм төрлийн програм хангамжууд нь харилцан яриаг чагнах, э-мейл шуудан илгээх, вэб сайтуудад нэвтрэх, нууц үгийг тайлах зорилгоор хэрэглэгддэг байна. Тиймээс албаныхан энэ программыг ямар зорилгоор авсан, яаж ашиглаж байгаа тухайгаа тайлбар хийх хэрэгтэй.