Энэ сарын 24 өдрөөс эхлээд нэг хэсэгтээ зогсонги байдалд орсон хайгуулын тусгай зөвшөөрлийг олгох болсоноо зарлав. Уг нь хайгуулын тусгай зөвшөөрлийг хэдэн жилийн өмнө АН-ын шахалтаар олгохоо зогсоосон юм. Харин одоо АН эрх барьж байх үед дахин олгохоор боллоо. Уул уурхайн сайдын төлөвлөж байгаагаар бол “хайгуулын тусгай зөвшөөрлийг олгож эхэлснээр хамгийн багадаа тэрбум гаруй ам.доллар” олох боломжтой гэнэ. Өөрөөр хэлбэл эдийн засгийн хямралаас гарахын тулд манай улсад хөрөнгө оруулалт, мөнгө хэрэгтэй байгаа. Энэ орон зайг нөхөхийн тулд хайгуулын тусгай зөвшөөрлийг олгох ёстой гэж Засгийн газраас санаачилга гаргасан. Уг санаачилга амжилттай хэрэгжихэд бэлэн боллоо.

    Хайгуулын тусгай зөвшөөрлийг хамгийн түрүүнд өргөдлөө өгсөн аж ахуйн нэгжид өгөхөөр бэлтгэж байгаа юм. Тийм учраас тусгай зөвшөөрөл эзэмших хүсэлт гаргасан аж ахуйн нэгжийн өргөдлийн дугаарыг компьютероор бүртгэх аж. Бас зөвшөөрлийг онлайнаар сонгож өгөх гэнэ. Тэгээд тухайн аж ахуйн нэгжид хайгуулын тусгай зөвшөөрлийг авч чадсан эсэхийг өдөрт нь мэдээлэхээр болов. Мэдээж энэ бүхнийгээ Уул уурхайн яамныхан “ил тод, нээлттэй, шуурхай, шударга” явдал хэмээн тайлбарлаж байна.
   
    Гэвч энэхүү “ил тод, нээлттэй, шуурхай, шударга” байдлын цаана асар том маргаан, асуудал бий гэж эх сурвалж мэдээлэв. Ялангуяа бизнес эрхлэгчид компьютероор хайгуулын тусгай зөвшөөрөл олгоно гэдэг бол байж болшгүй зүйл хэмээн үзэх болжээ. Учир нь өнгөрсөн сонгуулийг хар машинаар явуулаад ямар их маргаан мэтгэлцээн боллоо. Одоо болтол сонгуулийн хар машины талаарх маргаан тасрахгүй байна. Хайгуулын тусгай зөвшөөрлийг компьютероор олговол ийм л юм болно гэсэн яриа зарим нэгний дунд эрчимтэй тарж эхэллээ. Харин зарим бизнес эрхлэгчид үүнийг боломж ч гэж харж байж болох юм. Тэд компьютерийн программ дээр ажиллахад болохгүй зүйл байхгүй. Хүн л тэр программыг бүтээдэг гэж харж байгаа бололтой.

    Үүнээс гадна БНХАУ-ын хөрөнгө оруулалттай аж ахуйн нэгжүүд хайгуулын тусгай зөвшөөрөл авах асуудалд ихээхэн анхаарч байгаа гэж эх сурвалж мэдээллээ. Тэд компьютерийн программаар хайгуулын зөвшөөрөл олгох асуудлыг хамгийн зөв шударга гэж үзэж байгаа бололтой. Хэрэв хайгуулын тусгай зөвшөөрөл олгох асуудлыг түрүүлж өргөдөл өгсөн аж ахуйн нэгжүүдэд өгөх юм бол тэр нь БНХАУ-ын болон хөрөнгө оруулалттай аж ахуйн нэгжүүд байвал яах вэ гэсэн асуудал урган гарч иржээ. Эсвэл хятадууд монголчуудаар дамжуулан лицензийг бөөнөөр нь хармаалж мэднэ гэсэн хардлага их түгж байна.

    Уул уурхайн яамны мэдээлж байгаагаар бол нийт нутаг дэвсгэрийн 19.88 хувь буюу 31.09 сая га-г хайгуулын тусгай зөвшөөрөл хэлбэрээр олгох боломжтой гэж үзэж байгаа аж. Үүнээс сонгон шалгаруулалтын талбай 10.15 сая га-г эзлэх бол өргөдлөөр олгох талбай 20.94 сая га-г хамрана гэж албан мэдээнд дурджээ.

    Ийнхүү хайгуулын тусгай зөвшөөрлийг цахимаар, хамгийн түрүүнд өргөдөл гаргасан аж ахуйн нэгжид олгоно гэсэн шийдэл ихээхэн маргаан дагуулж мэдэхээр боллоо.