Тулгар төрийн 2225, Их Монгол улс байгуулагдсаны 810, Ардын хувьсгалын 95 жилийн ой, Үндэсний их баяр наадмын үеэр Монгол үндэсний уламжлалт хоолыг гадаадын жуулчид, зочид төлөөлөгчид, наадамчин олонд сурталчлах, хоол хийх урлагийг хөгжүүлэх, наадамчдад амт чанартай хоол хүнсээр үйлчлэх зорилго бүхий “Монгол хуушуур-2016” фестивалийг 2 дахь жилдээ амжилттай зохион байгууллаа. Фестивалийг Улаанбаатар хотын Захирагчийн ажлын албаны Хүнс, худалдаа, үйлчилгээний хэлтэс, дүүргүүдийн Засаг даргын Тамгын газрын Худалдаа, үйлчилгээний хэлтэс, Монголын Тогооч нарын холбоо тус тус хамтран зохион байгуулжээ. Фестивалийн үеэр “Хамгийн өвөрмөц хуушуур”, “Хамгийн амттай хуушуур”, “Хамгийн цэмцгэр асар” гэсэн 3 номинацаар шалгаруулалт явуулсан байна. “Хамгийн өвөрмөц хуушуур”-аар Дулааны 4-р цахилгаан станц ТӨХК-ийн хоолны газар, Төгс 4 эрдэм ХХК-ийн хоолны газар, “Хамгийн амттай хуушуур”-аар Гал хувь ХХК, Иргэн В.Цэцгээгийн хийсэн хуушуур, “Хамгийн цэмцгэр асар”-аар: Бодьмадмаараг ХХК-ний асар, Сант асар ХХК-ний асар тус тус шалгарлаа. Наадамчин олны дунд монгол ахуй, монголын түүх, монгол наадмын талаарх мэдлэгийг олгох танин мэдэхүйн “АХА” тэмцээнийг зохион байгуулж оюун ухаан, авхаалж самбаагаа сорьж түрүүлсэн оролцогчийг шагнасан байна. Мөн “Хэн хуушуурын гурилыг хурдан элдэх вэ”, “Хэн хамгийн олон хуушуур идэх вэ”, “Хэн хамгийн олон төрлийн хуушуур чимхэх вэ” зэрэг олон төрлийн хөгжөөнт тэмцээн зохион байгуулж оролцогчдыг аж ахуйн нэгжүүд бараа бүтээгдэхүүн, үйлчилгээний асраар үнэгүй үйлчлүүлэх эрхээр урамшуулжээ.

Наадмын өдрүүдээр худалдаа үйлчилгээний талбайд 870 гаруй хоол үйлдвэрлэл үйлчилгээний цэг ажиллаж наадамчин олондоо үйлчилсэн байна. Баяр наадмын үеэр Төв цэнгэлдэх хүрээлэн болон Хүй долоон худагт үйлчилгээ гаргах аж ахуйн нэгжүүдэд Нийслэлийн Мэргэжлийн хяналтын газар, Улаанбаатар Цахилгаан түгээх ТӨХК, Нийслэлийн Онцгой байдлын газар хамтран семинар зохион байгуулж, зөвлөгөө, мэдээллээр хангаж, худалдаа, үйлчилгээ эрхлэхдээ хүнсний аюулгүй байдал, техник хэрэгслийн аюулгүй ажиллагааг хэрхэн ханган ажиллахыг зөвлөсөн байна гэж Улаанбаатар хотын Захирагчийн ажлын албанаас мэдээллээ.

МАН-ын Удирдах зөвлөл хуралдлаа. Тус хуралдаанаар аймгийн Засаг дарга нарын томилгоог ярилцжээ. Одоогийн байдлаар Дорноговь, Говь-Сүмбэр аймгийн Засаг дарга нарыг томилоод байгаа аж. Зарим аймаг өнөөдрөөс ИТХ-аа хуралдуулж Засаг даргын нэрээ дэвшүүлж эхэлжээ.



Дашрамд дурдхад, тус хуралдаанаар сайд нарын томилгоо болон байнгын хороодын дарга нарыг сонгох тухай асуудлыг хэлэлцэнэ гэж байсан боловч хэлэлцээгүй аж.

Зика вирус бэлгийн замаар эмэгтэй хүнээс эрэгтэй хүнд халдсан анхны тохиолдол бүртгэгдлээ. Тодруулал, 30 орчим насны эмэгтэй шумуулаар халдвар тархдаг бүсэд очоод Нью-Йоркт эргэн иржээ. Долоо хоног халуурч, бие нь өвдсөн учир тэр эмэгтэй АНУ-аас гараагүй найз залуугийн хамт эмчид хандсан байна.

Дашрамд дурдхад, Вирус дэгдсэн цагаас хойш Аргентин, Чили, Шинэ Зеланд, АНУ, Франц, Итали, Канад, Перу, Португал, Герман, Испани гэсэн 11 улсад бэлгийн замаар халдвар тархсан тохиолдол бүртгэгдээд байна. Одоогийн байдлаар дэлхийн 60 улсад Зикагийн халдвар тархаад байгаа юм.

Дундговь аймаг Хөдөлмөрийн гавьяаны улаан тугийн одонгоор шагнуулав. 1973 онд мал сүргээ таван төрөл дээр нь өсгөсөн амжилтаар Өндөршил сумынхан “Алтан гадас” одонгоор шагнуулж байсан бол 43 жилийн дараа ийнхүү аймаг нийтээрээ төрийн дээд одон гардан авч байгаа аж. Ерөнхийлөгчийн зарлигт ”Үндэсний соёл, уламжлалыг хадгалан хамгаалах, өвлөн уламжлахад манлайлал үзүүлж, мал аж ахуй, аялал жуулчлалын салбарт шинэ санаачилга гарган, Монгол Улсын нийгэм, эдийн засгийн хөгжилд үнэтэй хувь нэмэр оруулан, бүтээлч нийгэм цогцлоохын төлөө мэргэжил, авьяас билгээ зориулан хөдөлмөрлөсөн Дундговь аймгийн ард иргэдийн хичээл зүтгэлийг өндрөөр үнэлж Хөдөлмөрийн гавьяаны улаан тугийн одонгоор шагнав” гэжээ.


Шагнал гардуулах ёслолыг нээсэн аймгийн ИТХ-ын дарга С.Буджав үг хэллээ. Тэрээр, “Манай аймгийн ард иргэдийн 75 жилийн хөдөлмөр, бүтээлийг төр үнэллээ. Дундговь аймаг гал голомтоо асаасан үеэс энэ л газар шороон дээр аж төрж, хөлс хүчээ аймгийнхаа хөгжил цэцэглэлтэд зориулсан ахмад үеийнхэн, жанжин Мижидээс эхлээд үе үеийн удирдлагууд, нутгийнхнаа төлөөлөн монгол төрийг түшилцэж явсан төр, нийгмийн зүтгэлтнүүд, энэ нутгаар овоглодог нийт ард түмэндээ түүхэн өдрийн халуун мэндийг хүргэе. Хөдөлмөрийн гавьяаны улаан тугийн одон маань Дундговийн хөгжлийг түлхэх хүч болно гэдэгт итгэж байна” хэмээн онцлов.

Энэ сарын эхний долоо хоногт хонины ястай мах нэг килограмм нь дунджаар 5965 төгрөг, үхрийн ястай мах нэг килограмм нь дунджаар 7125 төгрөгийн үнэтэй байлаа. Үхрийн ястай махны үнэ өмнөх долоо хоногтой харьцуулахад 4.9 хувиар буюу 365 төгрөгөөр буурч, харин үхрийн цул махны үнэ 1.0 хувиар буюу 90 төгрөгөөр өссөн байна.

Энэ долоо хоногийн ажиглалтаар үхрийн мах “Хархорин” хүнсний захад хамгийн хямд буюу 6500 төгрөг, харин “Меркури” хүнсний захад хамгийн өндөр үнэтэй буюу 10000 төгрөг байна. Хонины ястай махны үнэ өмнөх долоо хоногтой харьцуулахад 5.3 хувиар буюу 335 төгрөг, хонины цул мах 5.4 хувиар буюу 415 төгрөгөөр тус тус буурсан байлаа. Энэ долоо хоногийн ажиглалтаар хонины мах ”Баянзүрх”, ”Хүчит Шонхор’ “Хархорин” хүнсний захуудад хамгийн хямд буюу 5800 төгрөгөөр, харин ”Меркури” хүнсний захад хамгийн өндөр үнэтэй буюу 8800 төгрөгөөр худалдаалж байна.

Мөн энэ сарын эхний долоо хоногт нийслэлийн хүнсний томоохон зах, дэлгүүрт ”Алтан тариа” савласан нэг кг гурилын үнэ дээд зэрэг нь 1200-1500 төгрөг, нэгдүгээр зэргийнх 1000-1300 төгрөг, хоёрдугаар зэргийнх 780-1000 төгрөг байна. Худалдан авагч олон байдаг “Хүчит шонхор”, “Таван эрдэнэ”， “Бембөгөр”, ”Баянзүрх”, “Хархорин” хүнсний захуудад задгайгаар буюу шуудайгаар худалдаж буй нэг кг дээд зэргийн “Алтан тариа” гурилын үнэ 1150-иас 1300 төгрөгийн үнэ ханштай байна. Харин “Барс” хүнсний захад дээд зэргийн “Алтан тариа” гурил 1200 төгрөг, нэгдүгээр зэргийн гурил 1000 төгрөгөөр тус тус зарагдаж байна. ”Атар” талх хүнсний зах, дэлгүүрт 1100-1210 төгрөгийн үнэтэй байна. ”Бөмбөгөр”, Таван-Эрдэнэ”, ”Оргил”, “Хархорин” хүнсний захуудад ”Атар” талхыг хамгийн хямд буюу 1100 төгрөгөөр, харин ”Сансар” супермаркетад хамгийн өндөр үнээр буюу 1210 төгрөгөөр худалдаалагдлаа. Өмнөх долоо хоногтой харьцуулахад монгол манжин 52.0 хувиар буюу 1710 төгрөгөер өсч, харин монгол лууван 0.9 хувиар буюу 25 төгрөг, байцаа 11.1 хувиар буюу 250 төгрег, хятад сонгино 1.5 хувиар буюу 20 төгрөгөөр тус тус буурсан байна.

Сэлэнгэ аймгийн Онцгой байдлын газрын Гал түймэр унтраах, аврах 36 дугаар анги, Эрэн хайх аврах ангийн бие бүрэлдэхүүн баяр наадмын амралтын өдрүүдээр буюу 2016 оны 07 дугаар сарын 11-17-ны өдрүүдэд Сэлэнгэ мөрөн, Орхон голд завьт эргүүл ажиллуулж, иргэдийн аюулгүй байдлыг хангаж, болзошгүй ослоос урьдчилан сэргийлж ажиллалаа.

Завьт эргүүл ажиллах явцад Эрэн хайх аврах ангийн аврагчид хурдан шуурхай ажиллаж усанд живж байсан зургаан иргэний амь насыг авран хамгаалав.

Untitled-2

Тодруулбал, долоодугаар сарын 13-ны өдөр гурван иргэнийг, 14-ний өдөр гурван иргэнийг усанд живж байхад нь авран хамгаалж, ар гэрийнхэн болон цагдаагийн байгууллагад хүлээлгэн өгсөн.

Түүнчлэн энэ өдрүүдэд усанд осолдох аюулаас урьдчилан сэргийлэх ажлыг зохион байгуулж 101 тээврийн хэрэгсэл, 293 том хүн, 168 хүүхэд нийт 463 иргэнд сэрэмжлүүлэх материал тараан ажилласан юм.

Бразил улсын Рио де Жанейро хотноо ирэх наймдугаар сарын 5-21-нд болох зуны 31 дүгээр Олимпийн наадамд оролцох Монголын тамирчидыг энэ сарын 20-нд үднэ. Тус ёслол 11:00 цагаас Чингисийн талбайд болно. Нийтдээ 42 тамирчин есөн төрөлд өрсөлдөхөөр ”Рио 2016”-г зорих юм.

Монгол Улс түүхэндээ байгаагүй олон тамирчинг ”Рио 2016” Олимпийн наадамд оролцуулахаар болоод байгаа. Тодруулбал, жүдогийн 13, чөлөөтийн 10, баксын 6, хөнгөн атлетикийн 5, буудлагын 3, байт харвааны 1, хүндийн өргөлтийн 1, таеквондо 1 нийт 40 тамирчин Олимпийн эрхээ тулалдан байж авсан.

Нийслэлийн Онцгой байдлын газрын албан хаагчид баяр наадмын өдрүүдээр наадамчдын аюулгүй байдлыг хангах, Төв цэнгэлдэх хүрээлэн, Хүй долоон худагт гамшиг ослоос урьдчилан сэргийлэх, галын аюулгүй байдлыг хангуулах, аврах ажиллагааг хурдан шуурхай зохион байгуулахаар өндөржүүлсэн бэлэн байдалд үүрэг гүйцэтгэж ажиллажээ. 2016 оны 07 дугаар сарын 10-15-ны өдрүүдэд голын усанд боогдсон 11 дуудлагаар ажиллаж усанд боогдсон 57 иргэн, усанд суусан 14 авто машиныг завь болон аврах ажиллагааны техник хэрэгсэл ашиглан татаж гаргасан байна. Мөн гэр, хашаа борооны усанд автсан, барилгын зоорийн давхарт ус орсон гэсэн 22 дуудлагаар ажиллаж 52 айлын хашаанд тогтсон усыг соруулж, 7 айлд борооны ус зайлуулах суваг, шуудуу татах ажлыг хийж гүйцэтгэжээ. Голын усанд осолдож 8 хүн нас барсан. / 9-12 насны 2 хүүхэд 6 насанд хүрсэн хүн/, авто ослын 2 дуудлагаар ажиллаж 38 настай эмэгтэй М, 17 настай эрэгтэй Ц нарыг төмөр хийцэд хавчуулагдсан байсныг аврах ажиллагаа зохион байгуулан гарган ГССҮТ-д хүргэж, 2 иргэнд эмнэлгийн анхан шатны тусламж үзүүлжээ. Өндрөөс аврах ажиллагааны 2 дуудлагаар ажиллаж Баянзүрх дүүрэгт барилгын 10 давхраас унах гэж байсан 32 настай эмэгтэй Х-ийн амь насыг авран хамгаалсан байна. Мөн Сүхбаатар дүүргийн 3 хороо Хандгайтын 40 гудамжинд өндөр хүчдэлийн цахилгаан дамжуулах агаарын шугамын тулгуурт гарсан байсан иргэн Б гийн аврах ажиллагаа зохион байгуулж амь насыг аварчээ. Гадаадын жуулчдад болзошгүй аюул ослоос урьдчилан сэргийлэх, аюул осол тохиолдсон үед хаана ямар дугаарын утсанд хандаж тусламж авч болох талаар англи хэл дээр гаргасан 4000 гарын авлага материал тарааж өгч ажилласан байна. 7 дугаар сарын 10-ны өдрөөс 07 дугаар сарын 15-ны өдрүүдэд объектын гал түймрийн 24, эрэн хайх аврах ажиллагааны 26 нийт 50 удаагийн дуудлагаар шуурхай ажиллаж үүрэг гүйцэтгэж, 70 иргэнийг ахуйн болон техникийн холбогдолтой ослоос авран хамгаалсан байна гэж Нийслэлийн Онцгой байдлын газраас мэдээллээ.

Нийслэлийн гэмт хэргээс урьдчилан сэргийлэх ажлыг зохицуулах зөвлөлөөс санаачилан нийслэл хотод хүрэлцэн ирж байгаа жуулчид болон иргэдэд туслах, тэднийг гэмт халдлага, болзошгүй аюулаас урьдчилан сэргийлэх зорилгоор “Оюутан цагдаа” хөтөлбөрийг 2014 оноос хэрэгжүүлж эхэлсэн юм. Энэ жилийн Үндэсний их баяр наадам болон Улаанбаатар хотод зохион байгуулсан АСЕМ-ын уулзалтын үеэр нийт 110 “Оюутан цагдаа” үүрэг гүйцэтгэжээ. Тэд Төв цэнгэлдэх хүрээлэн, Чингисийн талбай, Хүй долоон худаг болон жуулчид ихээр зорчдог 88 гудамж зам талбайд ажиллаж, 3000 гаруй гадаадын иргэнд мэдээлэл өгч, хууль тогтоомжийг сурталчилан ажилласан байна. Мөн энэ өдрүүдэд цагдаагийн байгууллагын 6000 алба хаагч,олон нийтийн цагдаа, Хууль сахиулах их сургууль, ЦЕГ-ын Лицензийн төвийн алба хаагчид өндөржүүлсэн бэлэн байдалд үүрэг гүйцэтгэсэн байна гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Монгол Улсын Их Хурлын дарга М.Энхболд манай улсад албан ёсны айлчлал хийж байгаа Бүгд Найрамдах Солонгос Улсын Ерөнхийлөгч Пак Гын Хэд өнөөдөр /2016.07.18/ үдээс өмнө бараалхав.

Улсын Их Хурлын дарга М.Энхболд уулзалтын эхэнд БНСУ-ын Ерөнхийлөгч Эрхэмсэг хатагтай Пак Гын Хэг АСЕМ-ийн дээд түвшний уулзалтад оролцохын сацуу Монгол Улсад албан ёсны айлчлал хийж байгаад баяртай байгаагаа илэрхийлээд Монгол Улсын Ерөнхийлөгчтэй хийсэн албан ёсны хэлэлцээ үр дүнтэй болсонд баяртай байна. Таны Монгол Улсад хийж буй айлчлал хоёр орны харилцаанд нэгэн шинэ хуудсыг нээж, харилцаа, хамтын ажиллагааг шат ахиулан хөгжүүлэх, хоёр орны ард түмний найрсаг харилцааг бэхжүүлэхэд чухал хувь нэмэр оруулна гэдэгт итгэлтэй байна гэлээ.

Улсын Их Хурлын сонгуулийн дүнд МАН парламентад олонхи болж, шинэ Засгийн газраа бүрдүүлэх гэж байна. БНСУ-тай харилцах манай бодлого, үйл ажиллагаанд сонгуулийн дүн нөлөөлөхгүй, хоёр орны Иж бүрэн түншлэлийн харилцааг цаашид бэхжүүлэхэд монголын төр, засаг тууштай ажиллах болно гэдгийг Улсын Их Хурлын дарга энэ үеэр илэрхийлэв.

Эрхэмсэг хатагтай Ерөнхийлөгч Пак Гын Хэ цаг зав гарган уулзаж байгаад нь Улсын Их Хурлын даргад талархал илэрхийлээд Улсын Их Хурлын даргаар нь сонгогдсонд нь баяр хүргэж амжилт хүсэв. Мөн тэрбээр АСЕМ-ийн дээд түвшний уулзалтыг эх орондоо амжилттай зохион байгуулсан Монголын төр засаг, ард түмэнд талархал илэрхийлээд Солонгос, Монгол хоёр орны уламжлалт харилцаа, хамтын ажиллагаа сүүлийн жилүүдэд иж бүрэн түншлэлийн түвшинд бүхий л салбарт улам өргөжин хөгжиж байгаад баяртай байгаагаа онцлов. Ялангуяа иргэд хоорондын харилцаа өргөжиж буй нь хоёр орны харилцаа, хамтын ажиллагааг бүхий л салбарт улам гүнзгийрүүлэн хөгжүүлэх таатай нөхцөл болж буйг хатагтай Пак Гын Хэ онцлоод энэхүү харилцааг улам эрчимжүүлэхэд хоёр орны парламент ихээхэн хувь нэмэр оруулж ирсэн уламжлалтай, хоёр орны шинээр бүрдсэн парламентууд ч энэхүү харилцааг шинэ шатанд гаргаж хөгжүүлэхэд идэвх санаачлагатай ажиллана гэдэгт итгэж буйгаа илэрхийлэв.

Монгол Улс, БНСУ-ын харилцаа иж бүрэн түншлэлийн түвшинд бүхий л салбарт өргөжин хөгжиж байгаад сэтгэл хангалуун байдаг бөгөөд хоёр орны харилцааны хөгжилд парламент хоорондын хамтын ажиллагаа чухал үүрэг гүйцэтгэж, хоёр орны парламентын дарга нарын харилцан айлчлалууд чухал хувь нэмэр оруулсныг Улсын Их Хурлын дарга уулзалтын үеэр онцлоод парламент хоорондын хамтын ажиллагааг цаашид бодитой хөгжүүлэхэд парламентын гишүүд, парламент дахь найрамдлын бүлэг, Тамгын газар, Байнгын хороод хоорондын хамтын ажиллагаа, харилцан айлчлал чухал ач холбогдолтойг тэмдэглэв. Мөн БНСУ нь манай улсын гадаад худалдаа, хөрөнгө оруулалтын дөрөв дэх түнш орон. Цаашид хоёр орны нөөц бололцоо, давуу талуудыг ашиглан эдийн засгийн хамтын ажиллагааны цар хүрээг нэмэгдүүлнэ гэдэгт итгэлтэй байгаагаа дурдав. Түүнчлэн худалдааг либералчлах, хөрөнгө оруулалтыг нэмэгдүүлэх нь чухал ач холбогдолтой юм. Хоёр улсын хооронд хэтдээ Эдийн засгийн түншлэлийн хэлэлцээр байгуулах асуудлыг судалж эхлэх, энэ чиглэлд хамтарсан судалгаа хэрэгжүүлэх нь зүйтэй гэж үзэж байна. БНСУ-ын хөгжлийн албан ёсны тусламж, хөнгөлөлттэй зээл Монгол Улсын хөгжилд тодорхой хувь нэмэр оруулсан. Цаашид дэд бүтэц, уул уурхай, эрчим хүч, байгаль орчин зэрэг тэргүүлэх салбар чиглэлд тодорхой төсөл хөтөлбөрийг хэрэгжүүлэхэд Улсын Их Хурлын зүгээс анхаарч, дэмжлэг үзүүлэхэд бэлэн байгааг онцоллоо.

Хоёр орны иргэд хоорондын харилцаа ихээхэн өргөжсөн энэ үед агаарын харилцааны салбарын хамтын ажиллагааг улам өргөжүүлэх нь чухал байгааг Улсын Их Хурлын дарга онцлоод Улаанбаатар-Пүсаны чиглэлд энэ оны 6 дугаар сарын 24-нөөс байнгын нислэг үйлдэж эхэлсэнд баяртай байгаа. Цаашид талуудын нийлүүлж буй суудлын тоог ижил байлгах, Улаанбаатар-Бээжин-Чэжү чиглэлд Монголын талд нислэгийн 5 дугаар эрх олгох зэрэг асуудлыг харилцан ашигтай шийдвэрлэх арга замыг эрэлхийлэх нь зүйтэй гэж үзэж буйгаа хэлэв. Мөн БНСУ-д манай улсын хамгийн олон иргэн гэрээгээр болон хувиараа ажил хөдөлмөр эрхэлж байгаа бөгөөд манай иргэдийн ажиллах, амьдрах нөхцөлийг сайжруулах талаар БНСУ-ын Засгийн газрын зүгээс цаашид ч анхаарч дэмжлэг үзүүлэхийг хүслээ.

Түүнчлэн хоёр орны харилцаанд орон нутгийн төр, захиргааны байгууллагуудын шууд харилцаа, хамтын ажиллагаа чухал ач холбогдолтойг Улсын Их Хурлын дарга онцлоод 2000 онд Улаанбаатар хотын даргаар ажиллаж байхдаа хоёр орны нийслэл хотын найрсаг харилцааг хөгжүүлэх эхлэлийг тавьснаар Улаанбаатар хотод Сөүл, Намянжү хотын нэрэмжит гудамжууд, Сөүл хотод монгол дунд сургууль, соёлын төв, Намянжү хотод Монголын соёлын төв байгуулагдсан зэргийг онцлон дурдаад энэхүү уламжлалт харилцааг улам өргөжүүлэх, Сөүл хотод Улаанбаатар хотын нэрэмжит гудамж байгуулах нь чухал ач холбогдолтой юм гэлээ.

Хатагтай Ерөнхийлөгч Пак Гын Хэ хоёр орны эдийн засгийн хамтын ажиллагааны боломж их байгаа хэдий ч хөрөнгө оруулалт, худалдааны эргэлт төдийлөн их биш байгаад анхаарч үүнийг улам өргөжүүлэх, хамтын ажиллагааны уламжлалт салбаруудын зэрэгцээ мэдээллийн технологи, эрүүл мэндийн зэрэг шинэ салбарт хамтын ажиллагааг хөгжүүлэх боломжтойг дурдав. Мөн Эдийн засгийн түншлэлийн хэлэлцээр байгуулах асуудлыг анхаарч судлахаа илэрхийлээд хоёр орны агаарын харилцааны салбарын хамтын ажиллагаа, орон нутгийн шууд харилцааг хөхиүлэн дэмжиж улам өргөжүүлэхийн төлөө байгаагаа дурдлаа. Түүнчлэн БНСУ-д ажиллаж амьдарч байгаа гадаадын иргэд, тэр дундаа монгол иргэдийн ажиллаж амьдрах нөхцөл бололцоог сайжруулах, аюулгүй байдлыг хангахад Засгийн газрын зүгээс анхаарч ирсэн. Би Ерөнхийлөгч болсноосоо хойш гадаадын иргэдийн визийг хөнгөвчлөх чиглэлээр 5 удаа арга хэмжээ авсан, цааашид ч энэ асуудалд анхаарах болно гэлээ.

Уулзалтын үеэр талууд хоёр орны харилцаа, хамтын ажиллагааны болон бүс нутгийн хамтын ажиллагаа, харилцан сонирхсон бусад асуудлаар санал солилцож ярилцлаа.

Уулзалтад Монгол Улсаас БНСУ-д суугаа Онц бөгөөд Бүрэн эрхт Элчин сайд Б.Ганболд, Гадаад хэргийн яамны Төрийн нарийн бичгийн дарга Д.Ганхуяг, Улсын Их Хурлын Тамгын газрын Ерөнхий нарийн бичгийн дарга Б.Болдбаатар, албаны бусад хүмүүс байлцлаа гэж Улсын Их Хурлын Тамгын газрын Хэвлэл мэдээлэл, олон нийттэй харилцах хэлтэс мэдээлэв.

Аадар бороо, мөндөр орж уруйн үер буусны улмаас Орхон аймгийн Баян-Өндөр суманд А (11 настай, эмэгтэй), А (7 настай, эмэгтэй) нар нас барсан.

Бүсгүйчүүд бид үргэлж л шинийг эрэлхийлж хувцасны шүүгээгээ өөрчилж байдаг билээ. Гэхдээ улирал болгонд нэртэй, сүртэй трэнд гаргах брэндүүдийг Runway-ээс тэр чигээр нь хуулан өөрийнхөө шүүгээнд хийнэ гэдэг үнэхээр боломжгүй. Тиймээс ямар нэгэн трэндийг дагахдаа өөртөө хэдэн асуулт тавьж сурах хэрэгтэй.



- Энэ хувцасны загвар чамд зохих уу?

- Ийм өнгө чиний царайны өнгийг улам сайхан харагдуулж чадах уу?

- Энэ стиль чиний зан характерийг илэрхийлж чадах уу?

- Энэ авах гэж байгаа хувцас бусад хувцастай чинь зохицож чадах уу? Хэрвээ 5 өөр outfit болж чадвал маш сайн.

- Энэ трэнд удаан хугацаанд мода болж чадах уу?



Эдгээр шаардлагад нийцсэн бол худалдан авч болох юм. Тэгэхээр шоппинг хийхдээ өөрт чинь нэг зураг, ямар нэг санаа байгаа бол түүнийгээ дагахдаа үргэлж 3-5 янзаар өмсөж болох загварыг нь сонгох хэрэгтэй. Хамгийн гол нь Runway-ийг шууд хуулбарлах биш, хэрвээ тэр дизайнерийн трэнд таалагдсан бол өөртөө тохирох элементүүдийг сонгон худалдаж аваад өөрийн стилийг гаргах нь хамгийн чухал юм. Жишээ нь: D&G-ийн Runway-ээс ийм романтик стилийн фото чамд таалагдлаа гэхэд үүнээс санаа авч өөрийнхөөрөө хувцасны шүүгээнд байгаа юбка ч юмуу сандаалтайгаа тохируулан бусад зүйлсийг нэг их мөнгө үрэлгүйгээр трэнд болгон өмсөж болох юм.

Улсын Их Хурлын болон аймаг, нийслэлийн иргэдийн Төлөөлөгчдийн Хурлын 2016 оны сонгуулиар сонгогдсон шинэ гишүүд долоодугаар сарын 05-ны өдөр Монгол Улсын Ерөнхийлөгчийн зарлигаар тангарагаа өргөж, УИХ-ын гишүүний үнэмлэхээ гардан авсан билээ. Тэгвэл шинээр сонгогдсон гишүүд 30 хоногийн дотор хувийн ашиг сонирхлын болон хөрөнгө, орлогын мэдүүлгээ бүртгүүлэх үүрэгтэй байдаг. Тэгэхээр хуулийн дагуу шинэ гишүүд ирэх наймдугаар сарын 05-нд багтаан ХОМ-ээ гаргаж өгөх юм байна.

Авлигын эсрэг хуульд, ”10 дугаар зүйлийн 10.3, Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн 23 дугаар зүйлийн 23.3-т заасныг үндэслэн Улсын Их Хурлын гишүүд болон аймаг, нийслэлийн иргэдийн Төлөөлөгчдийн Хурлын Төлөөлөгчид тухайн албан тушаалд сонгогдсон буюу томилогдсон өдрөөс хойш 30 хоногийн дотор 2015 оны хувийн ашиг сонирхлын мэдүүлэг болон хөрөнгө, орлогын мэдүүлгээ холбогдох байгууллагуудад гаргаж бүртгүүлэх учиртай” хэмээн заасан байдаг.


Тиймээс Авлигатай тэмцэх газраас Улсын Их Хурлын гишүүдийн 2015 оны хувийн ашиг сонирхлын мэдүүлэг болон хөрөнгө, орлогын мэдүүлгийг тус газарт ирүүлэх талаар зохион байгуулалтын арга хэмжээг авч, хамтран ажиллах асуудлаар Улсын Их Хурлын Тамгын газрын ерөнхий нарийн бичгийн дарга Б.Болдбаатарт албан бичгийг хүргүүлсэн байна.

Хөвсгөл, Баян-Өлгий аймагт тарваган тахал өвчний шинж тэмдэг илэрчээ. Тиймээс хөдөө орон нутагт руу аялал зугаалгаар явж буй иргэдийг тарваган тахлын голомттой газраас мах идэхгүй байхыг анхааруулж байна.

Өнгөрсөн амралтын хоёр өдөр Улаанбаатар хотын цагдаагийн газарт 4137 хэрэг зөрчил бүртгэжээ. Үүний дийлэнх нь буюу 1020 нь зөрчлийн шинжтэй, харин 422 нь согтуурсан, 136 зам тээврийн осол, гэмт хэргийн 72 хэрэг бүртгэсэн байна.

Баянхонгор аймгийн Баацагаан сум, Дархан-Уул аймгийн Орхон сум, Дорнод аймгийн Халхгол сум, Завхан аймгийн Алдархаан сум, Сэлэнгэ аймгийн Мандал, Сүхбаатар сум, Төв аймгийн Лүн сум, Ховд аймгийн Булган сум, нийслэлийн Баянзүрх, Налайх, Хан-Уул дүүрэгт усны ослоор 17 иргэн амь насаа алдсныг (7 хүүхэд, 10 насанд хүрэгсэд) Онцгой байдлын албаны албан хаагчид цогцсыг гаргаж цагдаагийн байгууллагад шилжүүлсэн байна.

Монгол Улсын Ерөнхий сайд Ж.Эрдэнэбат манай улсад албан ёсны айлчлал хийж буй БНСУ-ын Ерөнхийлөгч Пак Гын Хэ-д бараалхлаа.

Ерөнхий сайд Ж.Эрдэнэбат БНСУ-ын Ерөнхийлөгч Пак Гын Хэ-г АСЕМ-ын дээд түвшний 11 дүгээр уулзалтад оролцож, манай улсад албан ёсны айлчлал хийж буйд талархаж байна гээд БНСУ-ын зүгээс АСЕМ-ын уулзалтыг зохион байгуулахад дэмжлэг үзүүлсэнд талархал илэрхийллээ.

БНСУ-ын Ерөнхийлөгч Пак Гын Хэ эх орондоо олон улсын өндөр дээд хэмжээний уулзалтыг амжилттай зохион байгуулсанд нь баяр хүргээд Ерөнхий сайдтай хоёр орны харилцаа, хамтын ажиллагааны талаар санал солилцов.

БНСУ бол манай улсын худалдаа, хөрөнгө оруулалтын түнш орон гэдгийг Ерөнхий сайд Ж.Эрдэнэбат онцлоод Засгийн газрын зүгээс цаашид тус улстай харилцах гадаад хамтын ажиллагаагаа үргэлжлүүлэн хөгжүүлж, Монгол БНСУ-ын Засгийн газар хоорондын комиссын үйл ажиллагааг улам идэвхжүүлэхээ илэрхийллээ.

БНСУ-ын Ерөнхийлөгч Пак Гын Хэ хоёр орны эдийн засгийн хамтын ажиллагааг хөгжүүлэхэд анхаарал хандуулж ажиллахыг Ерөнхий сайдаас хүслээ. Ерөнхий сайд Ж.Эрдэнэбат цаашид хөрөнгө оруулагчдын итгэлийг сэргээх, хөрөнгө оруулалтын таатай нөхцөлийг бүрдүүлэх хүрээнд хууль, эрх зүйн орчноо боловсронгуй болгох чиглэлээр ажиллахаа тодотгов гэж Засгийн газрын Хэвлэл мэдээлэл, олон нийттэй харилцах албанаас мэдээллээ.

Тарваган тахал өвчний эсрэг дархлаажуулалт өнөөдрөөс орон даяар эхэлж байна.

Урин дулааны улирал эхэлсэнтэй холбоотойгоор иргэд гол ус бараадаж амарч зугаалах явдал ихэсдэг. Тэгвэл иргэдийн амарч зугаалж буй газруудад хулгайн хэрэг ихээр бүртгэгдэх болжээ. Тэр дундаа голын эрэг орчмооор амарч байгаа иргэдийн эд зүйл алдагдах дуудлага цагдаагийн байгууллагад ирсээр байгааг сэрэмжлүүлж байна.

Улсын хэмжээнд баяр, амралтын өдрүүдэд нийтдээ объектын 21 гал түймрийн дуудлагад аймаг, нийслэлийн Онцгой байдлын газар, хэлтсийн Гал унтраах, аврах ангиуд үйлчилж холбогдох арга хэмжээг авч ажиллав.