УИХ-ын гишүүн М.Оюунчимэг байнгын хорооны хуралдааны үеэр ууттай боорцог гаргаж идснээрээ "боов" гэх хоч зүүхэд хүрсэн. Үүний дараахан УЕП асан М.Энх-Амгаланг чуулганы танхимаас загнаж, элдэвлэсэн үйлдэл нь бас л олон нийтийн дургүйцлийг төрүүлж, “овлигогүй” гэх нэр зүүхэд хүрсэн юм. Хэсэгтээ олны хэл амнаас зайдуухан байсан тэрбээр энэ сарын 23-ний өдрийн чуулганы үеэр хэлсэн үг нь ахмад гишүүдийн дургүйцлийг төрүүлээдэхэв. Учир нь чуулганы хуралдааны үеэр амны хаалт зүүгээгүйн дээр УИХ-ын дарга “Асуулт асуух цаг чинь яваад байна” гэсэн анхааруулгад хүртэл үл тоож хажуудах гишүүнтэйгээ шивэр авир хийж суусан. Аргаа барсан УИХ-ын дарга “Та зурагтаар гараад байна” гэж хэлснээр сая нэг анхаарлаа хандуулсан юм.
Ингээд УИХ-ын тухай хуулийн шинэчилсэн найруулгын төсөл болон хамт өргөн мэдүүлсэн хуулийн төсөлтэй холбогдуулан “УИХ-ын нэр хүнд унаж байгаа нэг шалтгаан нь ОЛОН ЖИЛ сонгогдсон гишүүд бие биенийхээ идэж, уусныг уудалж хэрэлддэг.
Энэ бүхнийг олон нийтийн сүлжээгээр харж суугаа иргэд ГУТАМШИГ гэж хэлдэг. Ийм зүйл битгий гаргаач ээ.
Эндээс УИХ-ын босго өндөр байх ёстой, нэр дэвших хүмүүс нэр цэвэр байх ёстойг харуулж байна. Энэ нь өнөө л улс төрийн нам, эвсэл, сонгогчдын боловсролтой холбоотой” гэсэн юм.
Түүний хэлсэн санааг хураангуйлбал, нэг талаасаа зөв ч гэлээ нөгөө талаасаа олон жил, олон удаа парламентад сонгогдсон гишүүдээс бол залуу гишүүдэд ирэх сонгуульд ялах боломжоо алдаж мэдэхээр байна гэсэн санаа цухалцаж буйг нуух юун.
Харин энэ санааг нь УИХ-ын гишүүн Б.Бат-Эрдэнэ ухаж ойлгосон бололтой багагүй эгдүүцсэн. Түүний хувьд “Хариуцлагаа ухамсарлаж, зайгаа барьцгаая“, “Үлгэрлэлийг өөрсдөөсөө эхлүүлж маскаа зүүцгээе” гэсэн ухуулах цаас урдаа хадсан байдалтай чуулганд оролцсон. УИХ-ын Ёс зүйн дэд хорооны дарга тэрбээр УИХ-ын гишүүдийг ухамсартай, ёс зүйтэй байхыг амаа урагдтал шахам шаардаж ирсэн хүний нэг. Гэвч парламентийн дэггүй гишүүд тэр бүр үг авахгүй байсаар өнөөг хүрсэн. Тэдний нэг нь М.Оюунчимэг гишүүн гээд хэлчихэд нэг их буруудахгүй байх. Учир нь цар тахлын үед чуулганыг цахимаар явуулах ёстой гэж өөрсдийн эрүүл мэндийг хамгаалахад дуу хоолойгоо хүргэсэн атлаа байнгын хороо, чуулганы үеэр цөөнгүй удаа амны хаалт зүүгээгүй юм. Ийн ёс зүйгүй, ухамсаргүй авирласан атлаа “Олон жил сонгогдсон гишүүдээс болж парламентийн нэр хүнд уналаа” гэж хэлсэн нь Б.Бат-Эрдэнэ гишүүний дургүйцлийг төрүүлсэн нь лавтай.
Тиймдээ ч Б.Бат-Эрдэнэ гишүүн “Хэд хэдэн гишүүдийн хөрөнгө орлого огцом өссөн асуудал гарсан. Хуулийн байгууллагад хандсан. АТГ-аас бичиг ирсэн. Эргэж хармаар зүйлүүд байна лээ.
М.Оюунчимэг гишүүний хувьд асуудалд ийм байдлаар хандаж хэлж болохгүй. Олон жил сонгогдсон гишүүдийн дунд алаг цоогтой зүйл бий. Өөрт чинь ч гэсэн асуудал бий шүү. Багцаатай ярьж хэлж бай. Би үүнийг хэлэх ёстой. Зөв зүйтэй зарчмын шаардлага тавьж байж ёс зүйтэй, нэр цэвэр байна шүү” гэсэн хатуухан шүүмжлэл хэлсэн юм.
Түүний хувьд элдэв хууль бус үйлдэлд холбогдоогүй, харьцангуй нэр цэвэр гишүүний нэг гэхэд болно. Харин М.Оюунчимэг гишүүний хувьд асуудал бий юү гэвэл бий. Энэ нь УИХ-ын гишүүн Л.Болд, М.Оюунчимэг, Ж.Мөнхбат нарын хөрөнгө орлого огцом нэмэгдсэн гэдэг асуудал. Уг асуудал УИХ-ын Ёс зүйн дэд хороонд ирсэн даруйдаа хууль хяналтын байгууллагаас тодруулна гэж байсан ч ямар хариу ирсэн нь тодорхойгүй байсан. Тухайн үед эл асуудлаар дээрх гурван гишүүн “АТГ цэг, таслал алдсан” гэж мэдэгдэж байсан.
Харин Б.Бат-Эрдэнэ гишүүний үгнээс үзвэл, ямар нэг “но” байгаа нь ойлгомжтой боллоо. Эндээс л М.Оюунчимэг гишүүн ахмад гишүүдийг адлаж, сонгуулийн замаа засах гэсэн биш "булхайгаа" илчлүүлэх дээрээ тулах шиг боллоо.
Г.Нацаг-Эрдэнэ
