Монгол Улсыг дэлхийтэй холбох гүүр болсон "УБТЗ" хувь нийлүүлсэн нийгэмлэгийн байгуулах Засгийн газрын хэлэцээрт 1949 оны зургадугаар сарын 6-ны өдөр Монголын талыг төлөөлж Ерөнхий сайд Маршал Х.Чойбалсан, Зөвлөлтийн талыг төлөөлж Онц бөгөөд бүрэн эрхт Элчин сайд Ю.Приходов нар гарын үсэг зурж байжээ. Ингэхдээ Наушка-Улаанбаатарын төмөр замыг барьж байгуулах ажлыг 1949 оны арванхоёрдугаар сард дуусгахаар шийдвэрлэсэн байдаг. 1953-1954 оны хичээлийн жилд Төмөр замын техникум нээлтээ хийж ирээдүйн төмөр замчдаа бэлтгэж эхэлсэн бол 1951 онд хүрээгээ өргөтгөн Төмөр замын сургууль комбинат байгуулагдсанаар 1952-1957 оны 3500 шахам хүн төмөр замын мэргэжил эзэмшсэн нь түүхэн үйл явдал болж байв.
Төмөр замын түүхэнд гараагаар эхлүүлсэн 1949-1960 он хүртэлх хугацаанд түүхэн олон үйл явдал болсон байдаг. Үүний нэг нь 1955 оны арванхоёрдугаар сарын 31-нд Улаанбаатар Замын-Үүдийн төмөр замыг нээх ёслолын үйл ажиллагаа Улаанбаатарт болсноор 1956 оны нэгдүгээр сарын 1-нээс эхлэн ЗСБНХУ, БНМАУ, БНХАУ-ын хооронд төмөр замын шууд харилцаа нээсэн тухайгаа дэлхийнд тунхаглан зарласан билээ. Ингээд 1956 оны нэгдүгээр сарын 3-нд Монгол, Хятадын хил дээр төмөр замыг холбосон мөнгөн хадаасыг хадах ёслолын ажиллагаанд БНМАУ-ын Ерөнхий сайд Ю.Цэдэнбал, ЗХУ-ын Зам харилцааны сайд Б.П.Бещев, БНХАУ-ын Зам харилцааны сайд Тэнь Дэ Юан нар оролцсон юм. Мөн оны тавдугаар сарын 30-ны хоёр улсын Засгийн газруудын шийдвэрээр Баянтүмэний төмөр замыг УБТЗ-д үнэ төлбөргүйгээр шилжүүлэн өгсөн бол Хонхор, Налайхын 13.7 км төмөр зам 1958 онд ашиглалтанд орсноор 1938 онд баригдсан нарийн царигийн 43 км замын үйл ажиллагааг 1958 оны есдүгээр сарын 5-аар тасалбар болгон хаажээ.
Улмаар 1960 оны арванхоёрдугаар сард УБТЗ байнгын ашиглалтанд орсны 10 жилийн ойгоор Улаанбаатар Зүтгүүрийн депогийн инженер Г.Мандах, машинч Ч.Ойдовням нар БНМАУ-ын Хөдөлмөрийн баатар цол хүртсэн нь түүхэнд тэмдэглэн үлдэж байжээ.
