Энэ долоо хоногт улс төрд болоод нийгэмд олон үйл явдал болж өнгөрлөө. 30 гаруй жил тасарсан олимпийн медаль, дэлхийн аваргын цомыг эх орондоо авч ирсэн чөлөөт бөхийн тамирчин Олимпийн хүрэл медальт, Дэлхийн хошой аварга Соронзонболдын Батцэцэгт Монгол Улсын Ерөнхийлөгч Х.Баттулга Хөдөлмөрийн баатар цол олгож, бөхөд хайртай монгол түмний магнайг тэнийлгэв. Түүнчлэн 20 орчим жил оньсого мэт байсан С.Зориг агсы амь насыг бүрэлгэсэн хэрэг эцэслэгдэж, анхан болон давж заалдах шатны шүүхээс 24-25 жилийн ял сонсоод байсан Ц.Амгаланбаатар, Б.Содномдаржаа, Т.Чимгээ нарт холбогдох эрүүгийн хэргийг Улсын дээд шүүх хянан хэлэлцэж, шүүх бүрэлдэхүүн тэнд 20 жилийн хорих ял оноон шийдвэрлэлээ. Энэ долоо хоногт болсон үйл явдлыг багц 24 буландаа онцолж байна.
С.Батцэцэгт Хөдөлмөрийн баатар цол олголоо
Монгол Улсын Ерөнхийлөгч Халтмаагийн Баттулга Үндэсний шигшээ багийн тамирчин Соронзонболдын Батцэцэгт Монгол Улсын Хөдөлмөрийн баатарын Алтан соёмбо тэмдэг, Сүхбаатарын одон гардуулан өглөө. Чөлөөт бөхийн тамирчин Олимпийн хүрэл медальт, Дэлхийн хошой аварга Соронзонболдын Батцэцэг нь 30 гаруй жил тасарсан олимпийн медаль, дэлхийн аваргын цолыг эх орондоо авч ирж, эх орныхоо нэрийг дэлхийн чихнээ цуурайтуулж яваа нэгэн юм.
Ц.Амгаланбаатар, Б.Содномдаржаа, Т.Чимгээ нарын ялын хэмжээг бууруулж тус бүр 20 жил болголоо
Төр нийгмийн нэрт зүтгэлтэн С.Зоригийн амь насыг бүрэлгэсэн хэмээн анхан болон давж заалдах шатны шүүхийн шийдвэрээр ялын дээд хэмжээ сонсоод байсан шүүгдэгч Ц.Амгаланбаатар, Б.Содномдаржаа, Т.Чимгээ нарт холбогдох эрүүгийн хэргийг Улсын дээд шүүх хянан хэлэлцэж, энэ сарын 4-ны баасан гарагт шүүх бүрэлдэхүүн шийдвэрээ гаргалаа. Шүүхийн шийдвэрээр Ц.Амгаланбаатар, Б.Содномдаржаа, Т.Чимгээ нарт тус бүрт 20 жилийн ялыг чанга дэглэмтэй хорих ангид ял эдлүүлэхээр шийдвэр гаргав.
Ингэхдээ өмнөх шүүх хурлаар тогтоосон “Нийгэмд онц аюултай гэмт хэрэгтэн” гэх заалтыг хүчингүй болгосон бөгөөд яллагдагчдын өмгөөлөгчийн зүгээс шүүх бүрэлдэхүүнд ирүүлсэн хүсэлтийг бүгдийг нь бүрэлдэхүүн авч хэлэлцээд, хүчингүйд тооцсон байна. Шүүхийн шийдвэрийг энэ оны долдугаар сараас эхлэн мөрдөгдөж эхлээд буй Эрүүгийн хуулийн шинэчлэсэн найруулсан хуулиар шийдвэрлэсэн юм.
Г.Шийлэгдамба анхан шатны шүүхээс хорих ял сонслоо
Сүхбаатар дүүргийн эрүүгийн хэргийн анхан шатны шүүхэд Г.Шийлэгдамба нарын дөрвөн хүнд холбогдох хэргийн шүүх хурал хоёр өдөр үргэлжилж, энэ сарын 3-ны орой шүүх бүрэлдэхүүн шийдвэрээ гаргав. Түүнийг Эрүүгийн хуулийн 268.2, бусдаас хээл хахууль авах гэсэн зүйл ангиар эрүүгийн хэрэгт буруутгаж, улсын яллагч ял төлөвлөөд байсан бол шүүх бүрэлдэхүүн хэргийг авч хэлэлцээд Г.Шийлэгдамбад 5.1 жил, харин түүнд авлига өгсөн О.Даваасүрэнд 1.6 жилийн ял оноосон байна. Харин ЭМСЯ-ны Төрийн нарийн бичгийн дарга асан Г.Ганчимэгт 19 сая 200 мянган төгрөгийн торгууль, "Метро Нетворк” компанийн гүйцэтгэх захирал Э.Гантулгад 14 сая төгрөгийн торгууль ногдуулжээ. Г.Шийлэгдамбыг Эрүүл мэнд, спортын яамны сайдаар ажиллаж байх үед нь 2015 оны 11-р сард ажлын өрөөнөөс нь АТГ-ынхан баривчилан шалгаж байсан билээ. Тэрбээр 500 сая төгрөгийн авлигын хэрэгт буруутгагдаж, ийнхүү анхан шатны шүүхээс хорих ял сонслоо.
"Сарнай хүүхдийн төв"-г барих аяны дуулиан дэгдэв
Энэ долоо хоногт бас нэгэн дуулиан тарьсан үйл явдал болж өрнөсөн нь ард түмний сэтгэлийн хандив эзэндээ хүрч байна уу эсвэл хэн нэгний бэлэн зууш болоод байна уу гэдэг асуудал байв. “Итгэл сэтгэлийн гүүр” ТББ-ын тэргүүн Ц.Сувд-Эрдэнэ хүний өөрийн нийлсэн 30 гаруй хүүхдийг өсгөж, улмаар "Сарнай хүүхдийн төв"-ийг барихаар хандив цуглуулж байсан М.Сарнай гэх эмэгтэйг хууран мэхлэгч байсан талаарх мэдээллийг олон нийтэд хүргэж, басхүү гайхширлыг төрүүлсэн. Энэхүү мэдээлэл цацагдсны дараа М.Сарнай ч мөн өөрийн байр суурийг илэрхийлж “Ц.Сувд-Эрдэнийг шунахайн сэдэлтэйгээр худал мэдээлэл цацаж байна. Сарнай хүүхдийн төвийн аян цааш үргэлжилнэ гэх мэдээллийг өгсөн. Тэдний өөр хоорондоо шидэлцэх үнэн худал нь үл мэдэгдэг мэдээллүүд нь цахим ертөнцийнхөнг талцуулж басхүү гомдол гайхширлыг төрүүлээд байгаа юм. Ядарсан нэгнээ гэсэн ард түмний сэтгэлийн хандив үнэхээр эзэндээ хүрч байна уу эсвэл хэн нэгний бэлэн зууш болоод байна уу гэдэг асуудал ч яригдах боллоо.
Ерөнхийлөгч захирамж гаргаж бие төлөөлөгчид болон зөвлөхөө томиллоо
Монгол Улсын Ерөнхийлөгч Х.Баттулга энэ доло хоногт хэд хэдэн томилгоог хийв. Тухайлбал, Ерөнхийлөгчийн Хэвлэл Мэдээллийн Албаны даргаар Ж.Цэсэнг томилсон бол Монгол Улсын Засгийн газрын гишүүн, Зам тээврийн сайд асан А.Гансүх, Монгол Улсын Хөдөлмөрийн баатар, гавьяат тамирчин Д.Дагвадорж нарыг бие төлөөлөгчөөрөө томиллоо. Мөн Монгол Улсын Соёлын гавьяат зүтгэлтэн, сэтгүүлч, яруу найрагч, зохиолч Цоодолын Хуланг Монгол Улсын Ерөнхийлөгчийн Соёл, шашны бодлогын зөвлөхөөр томилсон юм.
С.Баярыг эсэргүүцэгчид Лондонд дахин суулт зарлалаа
Английн Лондон хотод амьдардаг монгол иргэд тус хотод орших МУ-ын Элчин сайдын яамны гадаа энэ сарын нэгнээс эхлэн дахин суулт зарлахаар боллоо. Тэд Монгол Улсын Ерөнхийлөгч Х.Баттулгад Их Британи, Умард Ирландын нэгдсэн вант улсад суух элчин сайд С.Баярыг эргүүлэн татахыг шаардсан албан бичиг хүргүүлсэн бөгөөд албан бичгийн хариуг ирүүлтэл ийнхүү суулт зарлахаар болсон байна. Английн Лондон хотод амьдардаг монгол иргэд өмнө нь өнгөрсөн гуравдугаар сард мөн суулт зарлаж байсан юм.
24tsag.mn
Сэтгэгдэл (4)