“Яармагийн шинэ гүүр барих, хуучин гүүрийг засварлах” төслийн барилгын ажлыг 2017-2018 онуудад хэрэгжүүлж, графикт хугацаанаасаа өмнө буюу өнөөдөр /2018.11.02/ төслийн хүрээнд баригдсан нийт /4 эгнээ шинэ гүүр, 2 эгнээ хуучин гүүр, нүхэн гарц, рамп гүүр/ авто зам, байгууламжийн замын хөдөлгөөнийг нээлээ.

Монгол Улсын Засгийн газар болон Нийслэлийн Засаг дарга бөгөөд Улаанбаатар хотын захирагчийн 2016-2020 оны үйл ажиллагааны хөтөлбөрт эдийн засгийн өсөлтийг дэмжсэн, нийгмийн хэрэгцээ шаардлагад нийцсэн, аюулгүй, ая тухтай үйлчилгээг үзүүлэх авто зам, тээвэр, ложистикийн сүлжээг өргөжүүлэх зорилтын хүрээнд Улаанбаатар хотын хөгжлийн ерөнхий төлөвлөгөөтэй уялдуулан авто замын сүлжээг сайжруулах зорилгоор Баянзүрх, Яармаг, Сонсголонгийн гүүрийг шинээр барихаар тусгасны дагуу БНХАУ-ын Засгийн газрын хөнгөлөлттэй зээлийн хөрөнгөөр барьсан юм.

Нээлтэд НИТХ-ын дарга С.Амарсайхан, Нийслэлийн Засаг дарга бөгөөд Улаанбаатар хотын захирагч С.Батболд, БНХАУ-аас Монгол Улсад суугаа Элчин сайдын түр орлогч Ян Чин Дун, БНХАУ-аас Монгол Улсад суугаа Элчин сайдын яамны Эдийн засаг худалдааны зөвлөх  Сүн Вэй Рүн, Нийслэлийн Засаг даргын Дэд бүтэц, гэр хорооллын хөгжлийн асуудал хариуцсан орлогч П.Баярхүү, Нийслэлийн Засаг даргын Нийгмийн хөгжлийн асуудал хариуцсан орлогч Ш.Анхмаа, НИТХ-ын төлөөлөгчид, Нийслэлийн Авто замын хөгжлийн газрын дарга Ж.Тогтохбаяр нар болон бусад холбогдох албаныхан оролцлоо.

Төслийн ажлын захиалагчаар Нийслэлийн Засаг даргын Тамгын газар, Нийслэлийн Авто замын хөгжлийн газар, төслийн ерөнхий гүйцэтгэгчээр Хятадын зам барилгын тэргүүлэх компаниудын нэг Хятадын Төмөр замын 20-р товчоо групп корпораци, хяналтын зөвлөх үйлчилгээний компаниар ХБНГУ-ын “Эс Ар Пи Инженер Консалтинг Монголиа” ХХК ажиллалаа.

Уг гүүрэн байгууламжийн хувьд шинэ гүүр нь дөрвөн эгнээ бүхий 250 у/м урт, 20.5 м өргөнтэй, Д-рамп шинэ гүүр нь 276 у/м, 8.5 м өргөнтэй, хуучин гүүр нь 250 у/м, 9 м өргөнтэй, 57 у/м тунелтэй юм.

Б.Лхам