Монгол Улсын Их Хурлын дарга Г.Занданшатар орон нутагт ажиллах томилолтоо Баянхонгор аймгаас эхлүүлж байна.  

Тэрбээр төрийн албан хаагчид болон удирдах ажилтнуудтай уулзаж, УИХ-ын болон төр засгийн бодлого шийдвэрийг танилцуулж бүхий л шатанд сахилга хариуцлагыг өндөржүүлж ажиллахын зэрэгцээ төрийн албан хаагчид хүний төлөө гэсэн сэтгэл гарган хүчээ нэгтгэж ажиллахыг онцлон хэлсэн юм.

Мөн УИХ-ын даргын ажлын хэсэгт Зам тээвэрийн хөгжлийн сайд Б.Энх-Амгалан, БСШУСЯ дэд сайд Г.Ганбаяр нар багтжээ. Тэд салбар яамдын зүгээс орон нутагт хийж хэрэгжүүлэх ажлууд болон улсын төсвийн хөрөнгөөр хийгдэх бүтээн байгуулалтын талаар мэдээлэл хийсэн юм. Түүнчлэн БСШУСЯ дэд сайд Г.Ганбаяр Баянхонгор аймгийн боловсролын салбар урагш муутай ажиллаж байгааг хэд хэдэн жишээ баримтаар дурдаад БСШУСЯ-ны зүгээс тус аймгийн боловсролын салбарын ажил ямар шатанд доголдож байгааг шалган тогтоох ажлын хэсгийг ирэх сард багтааж томилно гэв.

Уулзалтын үеэр Баянхонгор аймгийн Засаг дарга Г.Батжаргал орон нутагт яаралтай хийж хэрэгжүүлэх шаардлагатай долоон асуудлыг эрэмбэлсэн хүсэлтийг Их Хурлын даргад албан ёсоор өргөн барьжээ. Түүнчлэн УИХ-ын дарга болон түүний ажлын хэсэг Баянхонгор аймгийн Цагаан цахирт үйл ажиллагаа явуулж буй зарим иргэд болон хувиараа ашигт малтмал олборлогчдыг дэмжих холбооныхонтой биечлэн уулзаж тэдний санал хүсэлтийг сонсчээ. Энэ үеэр ХАМО иргэдийг дэмжих холбооны тэргүүн Ч.Отгонбаатар холбооныхоо үйл ажиллагааны талаар танилцуулж “Спэйшл Майнз” ХХК-тай байгуулсан хамтран ажиллах гэрээг сунгах талаар хүсэлт тавьсан байна.