Б.Буджаргал: Би туйлдаж байна

2020-9-04

Б.Буджаргал бол холын зайн гүлтийн спортоор эцгийнхээ алдар, эх орныхоо нэрийг гаргаж буй амжилттай яваа тамирчин. Хамгийн сүүлийн амжилтаас нь дурдвал 2018 онд зургаан өдөр, зургаан шөнө тасралтгүй гүйдэг холын зайн гүйлтийн тэмцээнд 834 км гүйж ДАШТ-ий аварга болсон юм. Гэвч манай улсад холын зайн гүйлтийн спорт төдийлөн хөгжөөгүйгээс төр засгийн дэмжлэг байдаггүй. Тамирчид тэмцээнд оролцохдоо хувийн зардлаараа явдаг. Хэрэв бага ч болов анхаарал хандуулбал цаашид энэ төрлийн гүйлтийн тамирчинг бэлтгэх, дэлхийн рекордыг шинэчлэх боломжтой талаар учирлаж байсан юм. Б.Буджаргал тэмцээнд оролцох гэж Тайландыг зориод жил гаруй хугацаагаар гацжээ.

Тэрбээр "Би Тайланд улсад ирээд нэг жилийг өнгөрүүллээ. Энд Коронавирус дэгдэж, зорьж тэмүүлсэн зарим тэмцээн цуцлагдлаа. Гэхдээ монгол хүний тэсвэр тэвчээрийг дэлхий дахинд дахин нотлон харуулж, хүлээн зөвшөөрүүлэхийн төлөөх зорилгынхоо төлөө зогсохгүй зүтгэж байгаа. Энэ хугацаанд олон өдрийн гүйлтийн тэмцээнд есөн удаа оролцож, дөрвөн удаа аварга болсон. Амжилттай минь хамт баярлаж, дэмжиж явсан найз нөхөд, нутаг усныхан, нийт монголчууддаа туйлаас баярлаж явдаг. Гэхдээ энд нэг зүйлийг дурдахад улс эх орны маань жолоог атгаж байгаа албан тушаалтан, тэр дундаа спортын салбарынхан маань дэмжиж, тэтгэх нь байтугай баяр хүргээгүйд сэтгэл дундуур явдагаа хэлье. Хүн гэдэг сэтгэлийн амьтан. Бор зүрхээрээ байгаа зүйлээ зараад өр зээл тавьж, аргалсаар яваад өнөөдрийг хүрлээ. Надад чадах бүхнээрээ дэмжлэг үзүүлсэн олон хүн бий. Тэднийхээ урмыг хугалах үг хэлж байгаа юм биш. Заримдаа үнэхээр ганцаардаж туйлдах юм. Би монгол гэдэг нэрийг дэлхийд аль болох олон хүнд дуулгах юмсан гэж зорьж яваа жирийн залуу хүн. Одоо намайг 9, 10, 11, 12 дугаар сард дөрвөн чухал тэмцээн хүлээж байна. Өнөөдөр гэхэд идэх хоолны мөнгөгүй болсон ч хүний газар түрээсийн байрнаас хөөгдсөн ч шүд зуун бэлтгэлээ хангасаар байгаа. Гэсэн ч үнэндээ туйлдаж байна. Санхүүгийн хувьд өөрийн чадлаар тэмцээнд оролцох боломжгүй болж, бүхнийг жинхэнэ тэвчээрийн хүчээр даван туулж байна. Уг нь Олон өдрийн хэт холын гүйлтийн тэмцээнд Дэлхийд дөрвөн удаа түрүүлсэн амжилтаа баталж, дэлхийн дээд амжилтыг шинээр тогтоохын төлөө ийм амьдрал энэ хэцүү замыг өөрийн биеэр цор ганцаар туулж яваа юм. Тэмцээнүүддээ оролцож чадах юм бол би түрүүлж чадна. Монгол хүний тэсвэр тэвчээрийг гайхуулж, эх орноороо бахархуулах болно. Та бүхэн дэмжиж урам хайрлаарай хэмээн чин сэтгэлээсээ хүсье. Надад тэмцээнийхээ зардлыг олчихвол илүү юм хэрэггүй ээ. Миний оролцохыг зорьж байгаа тэмцээн гэвэл есдүгээр сарын 20-нд Тайландад болох 12 цагийн гүйлт,

‪аравдугаар сарын 1-нд БНХАУ-д болох зургаан хоногийн гүйлт,

‪арваннэгдүгээр сарын 16-нд АНУ-ын Флорида мужид болох зургаан хоногийн гүйлт, ‪арванхоёрдугаар сарын 28-нд АНУ-ын Аризона мужид болох зургаан хоногийн гүйлт. Би хэт холын зайн гүйлтийн дэлхийн дээд амжилтыг монгол хүн эзэмших ёстой гэсэн зорилгоосоо буцахгүй. Монголчууд бид чадна. Намайг дэмжиж хандив өргөвөл: Бямбаагийн Буджаргал, Хаан банкны данс: 5027402524 Худалдаа хөгжлийн банк: 499198105

Ийм олон хүн итгэж, дэмжиж байгаа учраас урам зориг орж байна. Та бүхний итгэлийг алдахгүй эх орныхоо нэрийг гаргаж, хэт холын зайн гүйлтийн дэлхийн рекордыг тогтоох болно. Дансныхаа мэдээллийг олон нийтэд ил тод тайлагнах болно" гэсэн юм.

Түүний өмнөх ярилцлагыг дараах холбоосоор уншина уу. https://www.24tsag.mn/a/178062

Б.Жаргал

АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.

Сэтгэгдэл (1)

Зочин (31.165.231.3)

ter arizonii zold ochij yheed yahavdee

2020 оны 09 сарын 04 | Хариулах