“Токио-2020” зуны олимпын наадмын чөлөөт бөхийн 53 кг-ын жинд хүрэл медаль хүртсэн Б.Болортуяагийн багш ДАШТ-ий мөнгөн медальт, ОУХМ Банзрагчийн Оюунсүрэнтэй ярилцлаа.
-Шавь тань олимпын медальтан болж, Монголын мянга мянган хүнийг баярлуулж байна. Танд яг одоо төрж буй сэтгэгдэл ямар байна?
-Миний хүсэн хүлээсэн энэ медалийг шавь маань авсанд хязгааргүй баяртай байна. Түүнийг өдийг хүртэл дасгалжуулж ирсэн Т.Сүхбаатар багшдаа баярлалаа гэж хэлье. Таны минь олон жилийн нөр их хичээл зүтгэл талаар болоогүйг харах сайхан байна. Б.Болортуяа маань мэдрэмжтэй, багын барилдаанч охин, тр зорьсондоо хүрлээ.
-Олимпоос медаль авна гэдэгт хэр итгэлтэй байсан бэ?
-Медаль авна гэдэгт нь эргэлзээгүй. Медаль авахын тул тэр их хичээсэн. Олимпын дэвжээнд гарах бүрт нь гараа чирүүлэн байж их догдолж үзлээ. Би 2012 оны намар Мөнхсүх ахынх урилгаар “Женко” клубт дасгалжуулагчаар ороход Б.Болортуяа 15 настай байлаа. Болороод чөлөөт бөхийн анхны суурийг нь тавьсан хүн гэвэл С.Мөнхсүх ах болон спортын мастер Мөнхтуяа маань юм.
-Б.Болортуяаг медалийн тавцанд гарахыг харахад ямар мэдрэмж хамгийн сайхан байв?
-ДАШТ-ээс мөнгөн медалиа хүртэж байсан үедээ буцаж очсон мэт санагдлаа. Охиноороо маш их бахархаж байна. Энэ том амжилтанд миний бол өчүүхэн нөлөө орсон. Хамгийн гол нь Сүхээ багшдаа дахин дахин баяр хүргэмээр байна.
-Түүний олимпын медальтан болно гэж өмнө нь төсөөлж байсан уу?
-Төсөөлөлгүй яах вэ. Болороо өөрөө ч олимп, дэлхийн медальтай мундаг тамирчин болно гэж ярьдаг байсан. Тэр маш хөдөлмөрч охин.
-Эндээс явахад нь шавьдаа юу хэлж захисан бэ?
-“Өөртөө мянган хувь итгэлтэй байгаарай. Чамд хүрэх тамирчин байхгүй гэж хэлсэн. “За багшаа, тэгнээ” гээд явсан.
Б.Жаргал
