Дэлхийн экспо болон Испани улсын соёлын нийгэмлэг өнгөрсөн оны арваннэгдүгээр сарын 12-ноос энэ оны зургадугаар сарын 10-ны өдрийн хооронд www.chess24.com онлайн платформ дээр дэлхийн сургуулиудын онлайн шатрын тэмцээний сонгон шалгаруулах 1, 2, 3 дугаар шатыг амжилттай зохион байгуулжээ. Тэмцээний шигшээ шат АНЭУ—ын Дубай хотод танхимаар зохион байгуулагдах юм байна. Дэлхийн 53 улс орнуудын шилдэг ерөнхий боловсролын сургуулиуд болон ерөнхий боловсролын сургалттай шатрын клуб, академийн 296 багийн нийт 2664 шатарчид оролцсон тус тэмцээнд манай улсаас Улсын тэргүүний 33 дугаар сургуулийн шатрын баг хэсгээсээ хоёрдугаар байрт шалгарч, тэмцээний шигшээ шатанд өрсөлдөх шилдэг 10 багийн нэгээр шалгарлаа. 33 дугаар сургуулийн багийн бүрэлдэхүүнд Их Мастер Д.Батсүрэн, ДШХМ Е.Төгстөмөр, ДШХМ Д.Мөнхзул, Н.Содбилэгт, Б.Алдар, Х.Баясгалан, Д.Өнөрзул, Х.Есүгэн, Н.Содгэрэлт нар тоглох юм.

Шигшээ шатанд дараах шилдэг сургуулийн багууд оролцоно:

1. Gujarat State Chess Association (Бүгд Найрамдах Энэтхэг улс)

2. Gymnazium Petra Bezruce Frydek-Mistek (Бүгд Найрамдах Чех улс)

3. Saco Oliveros (Бүгд Найрамдах Перу улс)

4. Hopkins Junior High School (Америкийн Нэгдсэн улс)

5. Velammal Nexus (Бүгд Найрамдах Энэтхэг улс)

6. 33rd Secondary School (Монгол улс)

7. Matrix Chess Academy (Бүгд Найрамдах Энэтхэг улс)

8. Ekpaideftiria Vassiliadi (Грек улс)

9. Green Village School (Израиль улс)

10. Csányi Alapítvány a Gyermekekért Közhasznú Alapítvány (Унгар улс)

11. EDM Torrelavega (Испанийн Вант улс)

12. Sharjah Cultural & Chess Club (Арабын Нэгдсэн Эмират улс)