МҮОХ-ны ерөнхийлөгчийг сонгох сонгууль хойшилсонтой холбогдуулан МҮОХ-ны ерөнхийлөгчийн албыг түр орлон гүйцэтгэгч, гавьяат дасгалжуулагч Чойжгаваагийн Наранбаатараас энэ асуудлаар зарим зүйл тодруулга авлаа.

-МҮОХ-ны ерөнхийлөгчийг сонгох сонгууль яагаад хойшлов?

-МҮОХ-ны Гүйцэтгэх зөвлөлийн хурал уржигдар болоход Ээлжит бус гишүүдийн хурлыг зарлан хуралдуулах тухай тогтоол гаргалаа. Зарим удирдах бүрэлдэхүүнд МҮОХ-ны ерөнхийлөгчийг сонгох сонгуульд оролцох зарим удирдах бүрэлдэхүүн нь Хараат бус сонгуулийн комисстой хараат байх үндэслэлтэй гэсэн гомдол ирсэн.

-Гомдол гаргасан хүн нь нэр дэвшигч, Монголын хөлбөмбөгийн холбооны ерөнхийлөгч А.Ганбаатар мөн үү?

-Тийм. Энэ чиглэлээр МҮОХ-ны ерөнхийлөгчийн үүрэг гүйцэтгэгч болон Хараат бус сонгуулийн комисст гомдол гаргасан гэсэн үг. Хараат бус сонгуулий комисс хэд хоногийн өмнө хуралдаж, “Бид ийм нөхцөлд ажиллах боломжгүй боллоо. Иймээс бид Хараат бус сонгуулийн ажлаас албан ёсоор чөлөөлөгдөж байна” гэсэн хүсэл гаргасан. Энэ тухай албан бичгээ МҮОХ-ны Гүйцэтгэх зөвлөлд өгсөн. Энэ талаар МҮОХ-ны Гүйцэтгэх зөвлөл яаралтай хуралдаж, дүрмийн 16.6-д заасны дагуу сонгуулийг хойшлууллаа. Ирэх сарын 20-ны өдөр Бүх гишүүдийн хурлыг зохион байгуулахаар тогтлоо. Эндээс Хараат бус сонгуулийн комиссыг дахин байгуулж, МҮОХ-ны чуулганы товыг зарлана. Мөн зарим дүрэмд нэмэлт өөрчлөлт оруулах талаар ярилцана.

-МҮОХ-ны ерөнхийлөгчийг сонгох сонгууль хэзээ болох юм?

-Хараат бус сонгуулийн комисс тогтооно. Өвлийн олимпын наадмын дараа болох болов уу. Хэд хэдэн спорт холбоод санхүүгийн асуудлаа эцэслээч гэдэг санал ирсэн. Дүрэмдээ зуны олимпын наадам зохион байгуулагдсанаас хойш дараа жилийн эхний улиралд багтаан хуралдуулна гэж байгаа. Спорт холбоод санхүүгийн тайлангаа гарга гэсэн хүсэлт тавьж байгаа. Үүнийг үндэслэж, Хараат бус сонгуулийн комиссоо дахин байгуулж авахгүй бол сонгууль явуулах комисс байхгүй боллоо. Ийм нөхцөл байдал үүссэн. Гүйцэтгэх зөвлөлөөс ирэх сарын 20-нд гишүүдийн хурал хийе. Чуулганы товыг зарлая, Хараат бус сонгуулийн комиссыг томилоё гэсэн байр суурьтай байна.

-Хараат бус сонгуулийн комиссыг яагаад цуцлах болов?

-Хараат байх үндэслэл байна гэх гомдол ирсэн. Үүнд Энхчулуун, Батзаяа, Одбаяр гэж гурван хүн бий.

-Энэ гурван хүнийг ашиг сонирхлын зөрчилтэй гэдгийг нь анхнаасаа шалгаж болоогүй юм уу?

-Бид шалгаад байх эрх зүйн боломж байхгүй. Дотоод хэрэгт нь хөндлөнгөөс оролцож болохгүй. Тэд хуулийн гаргалгаатай хүмүүс болохоор “Бид цаашид ажиллах боломжгүй гэдгээ мэдэгдэж, албан бичиг ирүүлсэн.

-Энэ хүмүүс ажиллах боломжгүй гэдгээ хэзээ мэдэгдсэн бэ?

-Энэ сарын 17-ны өдөр мэдэгдсэн.

-Тэд МҮОХ-ны ерөнхийлөгчийг сонгох сонгуульд өрсөлдөх хүмүүс нэрээ дэвшүүлсний дараа ажиллах боломжгүй гэж байгаа нь сонин байна?

-Бид мэдэхгүй.

Б.Жаргал