Монгол Улсын Ерөнхийлөгчийн зарлигаар улсын харцага цол хүртсэн Өвөрхангай аймгийн Зүүнбаян-Улаан сумын харьяат, Их Монголын хүчтэн дэвжээ, “АПУ” компанийн бөх, улсын харцага Баянзулын Цэдэнсодномын сэтгэгдлийг хүргэе. Тэрбээр өчигдөр “Бүрэн монгол” төслийн хүрээнд болсон барилдаанд түрүүлсэн юм.

Ерөнхийлөгчийн зарлигаар харцага цол авсандаа баяртай байна. Цол авсан өдрийнхөө өглөө энэ баярт мэдээг сонссон. Олон хүн баяр хүргэж байна. Хичээнэ дээ. “Бүрэн монгол” сангаас зохион байгуулсан барилдаанд харцага цолтой анх удаа барилдахдаа түрүүллээ, цолоо ч мялаалаа. Билэгшээж байна. Цол ахисан маань амжилт үзүүлэхэд нөлөөлж байна. Бас нэг зүйл бол бөхийн эрэмбэ гэдэг зүйл ямар үнэ цэнэтэй болохыг харуулж чадлаа. Би улсын харцага цолтой болсноор 50-аас доош насны улсын начин цолтой 120 бөхийн дээр эрэмбэлэгдэнэ. Бөх хүнд энэ их чухал. Бэлтгэл сургуулилтаа “Их Монголын хүчтэн” дэвжээ, “Мөнхий үсэг” группийн зааланд хангаж байгаа. Цаашид үндэсний бөх маань цэвэр ариун оршиж, допинггүй, найраагүй, булхайгүй байгаасай гэж хүсэж байна. Түмэн олныхоо итгэлийг алдахгүй хичээж, сайхан барилдана аа.

Б.Жаргал