Бидний эрхэм ах, хайрт аав, халамжит хань, ачлалт хүү, эрдэмт багш, гайхамшигт тайлбарлагч Эрдэнэбатын Балжинням 2021 оны арванхоёрдугаар сарын 16-ны өдөр зуурдаар таалал төгсөж, Монголын телевизийн салбарт нөхөж баршгүй хүнд гарз тохиолоо.

Э.Балжинням нь 1968 оны долоодугаар сарын 2-ны өдөр мэндэлсэн. 1976-1986 онд 10 жилийн дунд сургууль, 1986-1992 онд хуучнаар Гадаад хэлний дээд сургуулийг орос хэлний багш мэргэжлээр суралцаж төгссөн.

Тэрээр 1995-2007 оны хооронд Сэлэнгэ аймаг болон Улаанбаатар хотод Орос хэлний багшаар ажиллаж байгаад 2006 оноос TV9 телевизэд орсноор хөлбөмбөгийн тайлбарлагчийн гараагаа эхлүүлж байлаа. Талийгаач нь 2006-2010 оны хооронд TV9 телевиз, 2010-2013 оны хооронд C1 телевиз, 2013 оноос өнөөдрийг хүртэл SPS телевизэд хөтлөгч, тайлбарлагчаар ажиллаж байлаа.

2006 оноос хойш тасралтгүй 16 жил ажиллахдаа дотоод гадаадын нийт 2000 гаруй тоглолтыг шууд тайлбарласнаас гадна 200 гаруй телевизийн баримтат болон намтарчилсан нэвтрүүлгийг үзэгчдэдээ бэлтгэн хүргэхийн сацуу олон шөнийн нойроо хугаслан мянга мянган залуусыг дуртай спорттой нь хамт байлгаж, олон олон хүүхэд багачуудад хөлбөмбөгийн спортын гайхамшгийг таниулж, мэдрүүлж, түүнд дурлуулсан гайхамшигтай тайлбарлагч нь байлаа.

Талийгаачийн шулуун шударга, хөдөлмөрч, нөхөрсөг, хүнлэг энэрэнгүй, үргэлж инээд хөөрөөр хүрээлүүлж явдаг зан чанар нь бидний сэтгэлд үүрд дурсагдаж, дахин давтагдашгүй тайлбар нь Монголын телевизийн салбарт үргэлж үгүйлэгдсээр байх болно.