Бельгийн Антверпен хотод тавдугаар сарын 9-22-ны хооронд зохион байгуулагдсан CS:GO-ын ДАШТ гэгддэг Мэйжор тэмцээн амжилттай зохиогдож өнгөрсөн шөнө өндөрлөлөө. Уг тэмцээнд дэлхийн шилдэг 24 баг оролцсон бөгөөд манай улсыг төлөөлөн IHC Esport оролцсон гэдгийг та бүхэн мэдэж байгаа. Энэхүү тэмцээний финалын тоглолтод дэлхийн чансааны нэг болон хоёрдугаар байранд эрэмбэлэгдэж байгаа Фейз Клан болон Натус Винсер буюу бидний хэлж заншсанаар Нави багууд өрсөлдөгч бүрээ буулган авсаар хоорондоо нүүр тулсан.
Тоглолтын өмнө ихэнх и-спортын мэргэжилтнүүд Навиг ялалт байгуулна гэж таамаглаж байв. Финалын эхний тоглолт Фейз Кланы сонгосон Инферно гэх мап дээр өрнөсөн бөгөөд нэмэлт цаг гарсан ойрхон тоглолтын эцэст 19:16 харьцаатайгаар Фейз Клан ялалт байгуулсан. Харин дараагийн тоглолт Навигийн сонгосон Нюк мап дээр өрнөсөн боловч 16:10 харьцаатайгаар Фейз Клан дахин ялалт байгуулж цувралыг дуусгасан. Хэрэв Нюк дээр Нави ялалт байгуулсан бол цувралыг шийдвэрлэх тоглолт Эншент мап дээр гарах байлаа.
Хэрэв та финалд шалгарсан багуудын тамирчдын ямар улсаас гаралтай гэдгийг нь ажиглавал хэд хэдэн сонирхолтой зүйлс ажиглагдана. Нави бол Украин улсыг төлөөлдөг и-спортын байгууллага бөгөөд багийн бүрэлдэхүүнд нь 3 украин (нэг нь дасгалжуулагч), 3 орос тоглогчид байдаг. Орос-Украины нөхцөл байдал хяналтаас гарч хоорондоо байлдаж байгаа энэ үед тус улсын иргэд и-спортоор дамжуулан дэлхий нийтэд эв нэгдлийн үнэт чанаруудыг бодитоор харуулж чадсан. Гэхдээ уг багийн ирээдүй одоогоор тодорхойгүй байгаа бөгөөд дайнаас болж орос тоглогчид нь цаашид Украины багийн төлөө тоглох боломжгүй болох магадлалтай байгаа юм. Харин Фейз Кланы хувьд багийн гишүүд нь Норвеги, Латви, Канад, Дани, Эстони, Швед гэх зургаан өөр улсын иргэд. Харин уг тэмцээний хамгийн үнэ цэнэтэй тоглогчоор Фейз Кланы “Rain” гэх нэрээр тоглодог Хаавард Нюгаард шалгарч уг хүндтэй шагналыг 27 насандаа хүртсэн. 27 гэдэг бол и-спортын хувьд ахимаг насандаа тооцогддог. Ийнхүү хоёр долоо хоногийн турш үргэлжилсэн дэлхийн хамгийн нэр хүндтэй CS:GO-ын тэмцээн албан ёсоор хөшгөө хаалаа.
