Дэлхий дээрх хамгийн нэр хүндтэй сагсанбөмбөгийн лиг болох NBA-гийн 2021-2022 оны улирал өнөөдөр хөшгөө хааж Сан Франциско хотын Голден Стейт Уарриорс баг аваргаллаа. Лигийн хоёр удаагийн үнэ цэнэтэй тоглогч Стефен Карри, таван удаагийн бүх одод Клей Томпсон, тоглогчийн хувиар таван удаагийн, дасгалжуулагчийн хувиар гурван удаагийн лигийн аварга Стив Керр нараар тэргүүлүүлсэн Голдей Стейт Уарриорс улирлын тоглолтуудыг 53 хожил 29 хожигдолтойгоор дуусгаж Баруун бүсийн гуравдугаар байранд бичигдсэн.

Улмаар тэд Плей-оффын нэгдүгээр шатанд лигийн хоёр удаагийн үнэ цэнэтэй тоглогч Никола Йокичийн Денвер Наггетсыг 4:1, Мемфис Гриззлесийг 4:2, Даллас Мавериксийг 4:1 харьцаатай буулган авч бүсийнхээ аварга болсон.

Харин финалын шатад Зүүн бүсээс шалгарсан Бостон Селтикс багийн эсрэг өнөөдөр талбай дээр нь 90:103-аар ялалт байгуулснаар 4:2 харьцаатай цувралыг хааж долоо дахь удаагаа NBA-гийн аваргууд болж байна. Тэд өмнө нь 1947, 1956, 1975, 2015, 2017, 2018 онуудад лигийн аварга болоод байсан билээ.

Финалын үнэ цэнэтэй тоглогчоор уг цувралд 31.2 оноо, 6 самбараас авалт, 5 оновчтой дамжуулалт, 2 бөмбөг таслалт гэх статистик амжилттайгаар Стефен Карри нэрлэгдлээ.

П.Тамир