Спортын төрөлжсөн суваг “SPS HD” телевиз нь 2022-2023 оны улиралд контентын чанараа сайжруулах үүднээс Италийн хөлбөмбөгийн холбооны хамгийн нэр хүндтэй тэмцээн, Европын шилдэг 5 лигийн нэг “Сери А”-г албан ёсны эрхтэйгээр шууд дамжуулан үзүүлэхээр болсныг дуулгахад таатай байна. Мөн Английн хөлбөмбөгийн холбооны цомын тэмцээн болох "FA Cup"-г дамжуулах эрх авсан нь Монголдоо анхны тохиолдол болж байна.

“Сери А” лигийн нэг улирлыг дэлхийн 200 гаруй оронд 60 шууд дамжуулалтын баг 800 сая үзэгчдэд хүргэдэг. Жилээс жилд энэ тоо нэмэгдэж байгаа юм. Учир нь “Бага дэлхийн аварга” гэж нэрийддэг байсан Италийн хөлбөмбөгийн дээд лигийн өрсөлдөөн дахин ширүүссэн билээ. Үүнийг сүүлийн гурван улиралд өөр өөр багууд аваргын цомын эзэд болсноос харж болно.

1923-1924 оны улирлаас хойш “Сери А” лигт түрүүлсэн баг дараагийн улиралд Италийн төрийн далбаан гурван өнгийн судал бүхий “бамбай” хэлбэртэй бэлгэдлийг өмсгөл дээрээ байрлуулах эрхтэй болсон тул Италийн дээд лигийн цомыг “Скудетто” буюу “жижиг бамбай” гэж нэрлэжээ. Уг нэр хүндтэй эрхийг өнгөрсөн улиралд “АС Милан” клуб өөрсдийн болгож, 11 жилийн дараа “Скудетто”-г дахин эзэмшсэн билээ. Тэд 19 дэх түрүүгээ хүртэж “Интер Милан”-ы амжилттай зэрэгцэн очсон юм. Мөн “Сери А”-д хамгийн олон буюу 36 удаа түрүүлсэн “Ювентус” клубээс гадна, Жозе Моуриньогоор удирдуулж өнгөрсөн улирлын “Конференц” лигийн аваргаар тодорсон “Рома” зэрэг “Скудетто”-гийн төлөө шинэ улиралд хүч үзэх чанартай баг Италид цөөнгүй байна.

Лигийн хүснэгтийн эхний дөрвөн байрыг эзэлсэн баг “Аваргуудын лиг”-ийн хасагдах шатанд оролцох эрхийг авдаг бол тав болон зургаадугаар байрт бичигдсэн баг Европа лиг-т өрсөлдөнө. Харин долоодугаар байрын клуб “Конференц” лигийг зорих учиртай.    

SPS спортын төрөлжсөн телевиз нь 2022-23 оны улиралд UEFA Аваргуудын лиг, Европа Лиг, Конференц лиг, Ла Лиг, Сери А, ФА Кап гээд Европын хамгийн нэр хүндтэй 6 тэмцээнийг Монголынхоо үзэгчдэд хүргэх юм.