Энэхүү баг нь Охайо мужийн Дейтон их сургуулийг төлөөлөн “NCAA” буюу АНУ-ын коллежийн сагсанбөмбөгийн лигийн нэгдүгээр дивизионы “Атлантик-10” бүст харьяалагдан тоглодог баг юм. Багийн тоглолтууд Дейтон их сургуулийн “UD Arena”-д зохион байгуулагддаг байна.

Багийн дасгалжуулагч Энтони Грант нь тус багийг тав дах улиралдаа дасгалжуулж байгаа туршлагатай нэгэн.

“Dayton Flyers” баг нь АНУ-ын коллежуудын сагсанбөмбөгийн “AP Poll”  санал асуулгын шилдэг 25 багаас  2020 оны гуравдугаар сард гуравдугаар байрт орсон нь 1955-1956 оны улиралд хоёрдугаар байр эзэлснээс хойших хамгийн өндөр амжилт болсон байна.

Оюутны лигтээ тэд 117 жил өрсөлдсөн ч нэг ч удаа түрүүлж байгаагүй. Гэхдээ 18 удаа NCAA tournament буюу аварга шалгаруулах тэмцээнд шалгарч байсан амжилттай. Дээд амжилт нь 1967 онд Аваргын төлөө үлдэж байжээ. 

Хамгийн анхны тоглолтоо 1903 онд Дейтон хотноо хийж байсан нь өнөөгийн тэдний түүхийг эхлүүлжээ. Сургуулийн анхны багуудыг орон нутгийнхан нь  "Гэгээнтнүүд" гэж хочилдог байсан бөгөөд Охайо, Мичиган, Индиана, Нью-Йорк муж даяар коллеж, ахлах сургуулиудын хүрээнд өрсөлддөг байсан түүхтэй.

Энэ улирлын хувьд багийн гол тоглогч Малакай Смит бэртлээ сэдрээж улирлын эхлэлийг өнжихөөр болсон. Энэ нь Ш.Энхийн-Одын гарааны тавд багтах боломж байсан гэж хэлж болно.  Коби Брэйа хэмээх үндсэн тоглогч нь мөн бэртэлтэй байгаа. Будагтай талбайд ДаРон Холмс голлон довтолгоо гүйцэтгэдэг бөгөөд  дараа зун гэхэд “NBA”-д драфтлагдах магадлал өндөр хэмээн яригдаж байгаа аж. Шинжээчдийн таамаглаж буйгаар тус баг “Атлантик-10” дивизионоо тэргүүлэх магадлал өндөр байгаа юм.

Л.Сайнаа