УИХ-ын чуулганы хуралдаан үргэлжилж байна. Хуралдаанаар Газрын кадастрын тухай хуулийн төслийн хэлэлцэх эсэхийг шийдвэрлэхээр хэлэлцэж байна. Энэ үеэр УИХ-ын гишүүн Ш.Адьшаа үг хэлж, асуулт асуулаа.
Тэрбээр "УИХ-ын танхимд 10 гишүүн байна. Энэ том хуулийг ингэж хэлэлцэх нь зөв үү, УИХ-ын дарга, хурал зохион байгуулагчид аа. Анхаармаар байна. Орон нутгийн хилийн цэсийн асуудал, хот тосгоны хилийн цэсийн асуудлыг ганц байнгын хороогоор оруулж хэлэлцэх нь асуудалтай, Төрийн байгуулалтын байнгын хороогоор хэлэлцэх ёстой. Газрын асуудал ашиг сонгирхол, хэл ам дагуулсан хамгийн том асуудал учраас үүнийг Эдийн засгийн байнгын хороогоор хэлэлцье л дээ.
Ийм том асуудлыг Монгол Улсын үндэсний аюулгүй байдал, эдийн засагтай холбоотой асуудлыг нэг байнгын хороогоор хэлэлцэх нь учир дутагдалтай.
Төрийн байгуулалт, Байгаль орчин, хүнс хөдөө аж ахуйн байнгын хороонд харьяалагдах асуудлыг тус, тусад нь хэлэлцэх горимын санал гаргаж байна. Бэлчээрийн асуудлыг тойроод орон нутагт маш их асуудал байгаа. Хүнс хөдөө аж ахуйн байнгын хороогоор олон талаас нь хэлэлцэж байж, нийгмийн харилцааг зохицуулсан хууль батлагдана. Асуудалд ингэж хандмааргүй байна" гэв.
Д.Батчулуун
Сэтгэгдэл (2)